Beirute: PR libanés ko'alia kona-ba neglijénsia ka misil no rekuza inkéritu internasional

Iha loron-sesta ne'e, Prezidente libanés, Michel Aoun, afirma ona katak esplozaun iha portu Beirute karik akontese tanba "neglijénsia ka asaun externa", evoka posibilidade "hosi misil ida" maibé rekuza ona investigasaun internasional ida ba akontesimentu.

"Karik akontese tanba neglijénsia ka hosi asaun externu ida, ho misil ida ka bomba ida", deklara hosi xefe Estadu Líbanu nian iha enkontru ho jornalista sira ne'ebé transmiti iha televizaun, liutiha loron tolu hafoin katástrofe ne'ebé halo ona ema na'in 154 mate no ema rihun resin kanek.

Hanesan ba dala uluk maka responsável libanés ida evoka pista externu ida iha kazu hosi esplozaun sira, ne'ebé maka autoridade libaneza sira duun nafatin ba inséndiu ida iha entrepostu ida ne'ebé maka rai nitrato amóniu ho tonelada 2.750 resin.

Xefe Estadu, tinan 85, adianta ona katak iha loron-kinta husu "pesoalmente" ba Prezidente fransés, Emmanuel Macron, ne'ebé simu iha palásiu prezidensial, "hodi fornese imajen aéreu sira hodi bele determina katak iha ka la'e aviaun sira iha fatin (aéreu) ka misil sira" iha momentu esplozaun loron-tersa ne'e.

"Bainhira ema fransés sira la estabelese imajen sira ne'e, ami sei husu ba nasaun sira seluk", nia adianta.

Iha parte seluk, Aoun rejeita ona investigasaun internasional ruma kona-ba asuntu, hodi konsidera katak ne'e sei "halo fraku de'it verdade".

Komisariadu Aas ONU nian ba Direitu Ema nian husu ona investigasaun independente sira ba esplozaun sira, insisti atu "rona pedidu sira responsabilizasaun nian hosi vítima sira", hafoin Emmanuel Macron apela iha loron-kinta ba inkéritu internasional ida "transparente".

Maibé, Prezidente libanés konkorda ona ho nia homólogu fransés atu apela ona ba responsável sira Líbanu nian hodi "muda sistema".

"Ami hasoru revizaun ida hosi ami nia sistema konsensual, tanba paralizadu hela no la permiti atu foti desizaun sira ne'ebé maka bele aplika lalais: tenki hanesan konsensual no liuhosi autoridade oioin", Aoun hatete hodi kritika hosi parte barak hosi opiniaun públika libaneza, liuliu aumenta dezde esplozaun devastador sira iha portu kapital libaneza nian.

Kona-ba ezisténsia hosi nitrato amóniu tonelada 2.750 iha portu sidade nian, Aoun hatete ona katak simu informasaun kona-ba asuntu iha loron 20 Jullu no hatutan katak "haruka lalais" autoridade militar sira ho seguransa nian hodi halo saida maka nesesáriu.

La avansa pormenor sira seluk, Prezidente hatete ona katak governu oioin dezde tinan 2013 simu ona avizu sira kona-ba material.

Líbanu hasoru hela krizi ekonómiku séria - marka ho desvalorizasaun ida ne'ebé maka nunka akontese hosi nia osan, hiperinflasaun, despedimentu maka'as -, agrava ho pandemia hosi koronavírus foun ne'ebé halo ona autoridade sira izola populasaun durante fulan tolu.

Sapo TL | Lusa