Horta “Lakohi” Lú Olo Rezigna Na

DILI: Eis Prezidente Repúblika José Ramos Horta informa to’o ohin loron nia seidauk asina petisaun husi grupu Rezistensia Nasionál Defende Justisa no Konstituisaun RDTL, tanba petisaun ne’e rasik nia seidauk lee, no maske konkorda ho ideia iha petisaun refere, la signifika nia sei asina.

Laureadu Nobel da Pas ne’e hato’o kestaun ne’e relasiona ho deklarasaun husi Portavoz grupu RNDJKRDTL, Angela Freitas foin lalais ne’e, katak Horta asina ona petisaun hodi ezije Prezidente Repúblika Francisco Guterres Lú Olo rezigna an.

Horta esplika katak, nia prezensa iha Sede Nasionál RNDJ-KRDTL iha 23 Jullu, tanba nia konsidera konvite ne’ebé fó ba nia.

“Ha’u kuandu grupu ruma, kiik ka boot, forte ka fraku. Purezemplu, uluk kuandu KHUNTO ema la koñese, sira kontaktu ha’u par enkontru, dehan partidu foun ida naran KHUNTO, ha’u ba.

Kuandu KHUNTO manan kadeira lima iha 2017, sira telefone kedas ha’u. Sira telefone tanba sa?, Sira hatete “uluk ita-boot bainhira ami reuniaun, boot ka kiik, ami konvida, ita nunka falta, tanba ida ne’e mak ami komprimenta kedan ita-boot, ami manan kadeira lima,” dehan Horta iha nia rezidensia Metiaut, Kuarta (06/08).

Tuir Horta, nia sei konsidera konvite hotu-hotu husi see de’it hodi partisipa iha sira-nia atividade ka ba rona sira-nia hanoin.

Tan ne’e, bainhira simu konvite husi RNDJ-KRDTL, nia mós buka tempu hodi ba hasoru.

Horta hatete, bainhira nia ba hasoru-malu ho ekipa RNDJ-KRDTL atu rona sira-nia, sira husu atu Horta asina petisaun, maibé Horta rekuza ho razaun katak nia presiza lee lai petisaun refere molok foti desizaun.

“Ha’u hatete ba sira, ha’u la asina petisaun arbiru. Deklarasaun, petisaun barak iha mundu ne’e ema haruka ba ha’u, ha’u estuda didi’ak, balun ha’u la asina, tanba, ha’u hatete mós ba sira ‘ha’u la koñese asuntu ne’e ho didi’ak, ha’u nunka koalia kona-ba asuntu ida ne’e, derrepente ha’u asina, laiha kredibilidade, tanba ema barak hatene ha’u nunka liga ba ida ne’e’, entaun ha’u husu deskulpa ba sira.”

Independente