MP HUSU LOKE INVESTIGASAUN FOUN BA XANANA GUSMÃO

Ministériu Públiku (MP), husu ba Tribunal atu hatun estraia sertidaun hodi loke investigasaun foun ba eis Primeiru Ministru, Kay Rala Xanana Gusmão, atual Ministru Planeamentu Investimentu Estratejiku.

Pedidu ne’e MP hato’o, Segunda (27/07), iha Tribunal Distrital Dili (TDD), kona ba alegasaun ba kazu abuzu poder ne’ebe komete husi arguidu eis Komandante Servisu Investigasaun Kriminal Nasional (SIKN).

Iha momentu julgamentu ba kazu abuzu poder ne’e, sasin Kay Rala Xanana Gusmão deklara ba tribunal katak nia mak fo ordem ba arguidu hodi haruka trafikante droga nain lima (5), nain hat (4) husi Indonesia no Afrika do Sul ida (1) fila ba Indonesia. Tan ne’e haree ba aktus sira ne’e nesesidade duni atu husu ba Tribunal atu halo estraia sertidaun ba Ministériu Públiku hodi loke fali investigasaun foun ba Eis Primeiru Ministru, Kay Rala Xanana Gusmão.

Hafoin rona tiha pedidu husi Ministeriu Publiku nian ne’e, husi parte tribunal mos konkorda katak sei halo fali estraia sertidaun para Ministeriu Publiku hodi loke investigasaun foun fali ba eis Primeiru Ministru Kay Rala Xanana Gusmão tanba iha momentu ne’e nia dehan nia mak haruka arguido halo.

Kona ba kazu arguido Calisto nian, hafoin rona tiha akuzasaun husi Ministeriu Publiku no parte defeza iha alegasaun ne’e, husi parte tribunal desidi desizaun ikus muda fali ba iha dia 17/09/2015 tuku 11 OTL.

Iha audensia ba kazu refere prezidi husi juiz koletivu, Juiz Prezidente Jose Maria de Araújo, Zumiaty Freitas, Maria Solana, Ministériu Públiku, prokuradora Angelina Saldanha, Defensor Públiku, Sergio Quintas.Des

Jornal Nacional