PR TAUR NOMEIA HORTA SAI ENVIADU ESPESIAL BA GUINE BISSAU

Prezidente Repúblika (PR), Taur Matan Ruak, fó konfiansa hodi nomeia eis Prezidente Repúblika, José Ramos Horta hanesan enviadu espesial Prezidente Comunidade dos Paises de Lingua Portuguesa no Prezidente Repúblika Demokratika de Timor Leste, hodi reprezentan Xefe Estadu Taur Matan Ruak Ba Guine Bissau atu akompaña situasaun iha Guinea Bissau.

Ramos Horta informa katak, misaun ninian ba Guine Bissau ne’e, hanesan enviadu espesial Prezidente da Repúblika Timor Leste no CPLP ba Guinea Bissau ne’e, atu akompaña situasaun iha nasaun refere, hodi akonsela ba PR Taur atu Xefe Governu Timor Leste ne’e tetu, saida mak Timor Leste halo tan ba Guine Bissau.

“Prezidente da Repúblika Taur Matan Ruak, husu ba ha’u atu halo vizita ba Guine Bissau, i ha’u prontu atu ba iha fulan Setembru karik. Ha’u ba haree situasaun ne’e la’o oinsa,”informa Ramos Horta ba jornalista sira iha MNEK Dili, Segunda (27/7).

Ramos Horta dehan, nia ba Guine Bissau ne’e nu’udar enviadu Prezidente da Repúlika Taur Matan Ruak, ne’ebé nu’udar mós prezidente CPLP. Maibé Horta dehan,   Governu seidauk konvida nia atu hala’o vizita ida ne’e.

Horta hatuan, agora dadauk ne’e, nia labele fó komentariu kona-ba situasaun Guine Bissau nian, tanba nia mós seidauk hatene, saida mak la’o ona iha ne’eba.

Purtanto, Horta mós dehan, CPLP hanesan organizasaun importante ida ne’ebé reprezenta rai sira koalia lian portugues husi Afrika, Asia, no Europa no America.

Horta dehan, ida ne’e hanesan ponte ligasaun ida ne’ebé diak no maka’as entre kada membru, ne’ebé tama iha organizasaun CPLP.

“Agora ne’e rai barak mak hakarak tama, hanesan Indonesia, Japaun, Turkia, Jorgia no rai seluk tan husu hela atu tama nu’udar observador, tanba sira haree CPLP nu’udar organizasaun efikas,”katak Horta.cos

Jornal Nacional