LIDERA CPLP LA’OS ATU HETAN KEDAS BENEFISIU

Prezidente Partidu FRETILIN Francisco Guterres ‘Lu-Olo’ hatete katak, Timor Leste lidera Prezidensia Comunidade dos Paises de Lingua Portuguesa (CPLP) ne’e, la’os atu hetan kedas benefisiu, maibé ninia benefisiu ne’e sei mai iha loron ikus.

“Ema dehan benefisiu tenke mai ohin ou aban kedas, ha’u hanoin ita tenke trata mak vizaun estratéjiku CPLP nian, naturalmente ninia isin ka benefisiu ne’e tempu ida sei mosu mai,”dehan Lu-Olo ba jornalista sira iha MNEK Dili, Sesta (24/7).

Eis Prezidente Parlamentu Nasional ne’e fó ezemplu katak, kuda ai-oan ida, la’os ohin ka aban fó kedas isin, maibé sei presiza tempu. Bainhira Estadu membru CPLP kumpri promesa, Lú-Olo fiar katak bele hasai povu husi mukit no kiak.

“CPLP hakarak atu lori ba susesu, tenke involve husi nasaun CPLP hot-hotu, liu-liu konsórsiu mina ninian ne’ebé mak iha reuniaun Xefe do Estadu ho Xefe do Governu deside no husik hela, ida ne’e hanesan referensia to’o ohin loron CPLP kaer tutan nafatin,”afirma Lú-Olo.

Maibé to’o oras ne’e, konsórsiu mina ho gas ne’e seidauk iha komprimisu ida ne’ebé klaru. Tanba konsórsiu ne’e rasik sei involve mós Timor GAP ho kompañia mina nian iha nasaun CPLP tomak.

Konsórsiu ne’e, husi parte Timor Leste nian lidera husi Ministru Petrolíu no Rekursu Minerais Alfredo Pires hamutuk ho Autoridade Nasionál Petroleu(ANP).

Alende ne’e, Lu-Olo konsidera reuniaun ordinária hanesan diskusaun futuru CPLP nian, li-liu ba moris diak povu nasaun mebru CPLP tomak nian.

“CPLP tenke haree ba kestaun hamlaha ninian, hadia aihan ba populasaun tomak, ida ne’e hanesan polítika ida ke bo’ot, mas presiza involve Governu sira hotu para atu bele hadia, liu-liu ministériu agrikultura CPLP nian halo enkuadramentu polítiku, legal, juridiku, hodi atinje dezenvolvimentu kada país nian,”katak Lú-Olo.

Prezidente Partidu FRETILIN ne’e relata, CPLP hasoru difikuldades mak la hela hamutuk iha kontinente ida. Tanba nasaun do’ok malu, liña koordenasaun defisil tebes, maibé liu husi meius komunikasaun teknolojia fásil.

Maibé Lú-Olo sujere CPLP tomak tenke halo parseiru dezenvolvimentu ho loloos, nune’e hot-hotu bele hetan befesisiu. cos

Jornal Nacional