Adriano Maka “La-Sama”, “La-Sama” Maka Adriano

Finalmente, Adriano do Nascimento eleitu sai Prezidenti Partidu Demokrátiku (PD) ba periodu 2015-2016. Adriano eleitu liu-hosi konferénsia extraordináriu ne’ebé hala’o iha Sentru Formasaun La-Sama, Kampun Baru, Comoro, Sábadu (19/09/15).

Antes ne’e, Adriano hanesan vise prezidenti PD no bainhira saudozu La-Sama hakotu iis iha 01 Juñu 2015, nia (Adriano) promovidu sai Prezidenti Interinu PD.

Sekretáriu Jerál PD, Mariano Assanami Sabino informa katak partidu ida sai forti presiza rona malu, unidade, labele tarata malu no ko’alia át malu.

“Ba oin, imi no ita hotu rona Adriano maka “La-Sama” no “La-Sama” maka Adriano. Imi rona nia hanesan imi rona saudozu “La-Sama”,” Assanami dehan.

Nia informa, PD, partidu úniku mesak lideransa foun prepara ba jerasaun foun aban bainrua nian. Tanba ne’e, tenke prepara án agora. Lalika hein tan, tanba tempu ne’e limitadu liu ona. La kle’ur de’it komesa tama kampaña, tan ne’e nia husu ba estrutura partidu hahú hosi baze no to’o mai nasionál reativa fila fali.

Iha fatin hanesan, Prezidenti Foun PD, Adriano Nascimento informa katak la’os sai prezidente ona ne’ebe buat hotu-hotu loos ona. Lae! Presiza hadi’a no serbisu hamutuk atu nune’e bele kontribui saida maka ba oin atu prepara iha tempu kampaña.

“Programa tolu 3 maka sai importante—hadi’a jestaun adminnistrativu partidu, konsolidasaun polítika no formasaun lideransa polítika,” nia esplika.

“Tanba ami nia saudozu prezidenti partidu La-Sama husik iha dalan klaran no iha estatutu ne’e mós ko’alia ema ne’ebé besik maka bele ba túr ka asumi kargu prezidenti partidu,” Adriano tenik.

Komisáriu Polítika PD, Paulino Monteiro haktuir, foin lalais ne’e PD ho nia estrutura tomak legaliza ajustamentu fila fali deside Vise Prezidente PD, Adriano do Nascimento maka asumi fali saudozu “La-Sama” nia fatin. Ne’e hanesan kontinuasaun.

Iha tinan oin (2016), nia tenik, PD sei realiza kongresu nasionál ne’ebé maka atu hili estrutura partidu nian ba tinan lima (2016-2021).

Aleinde ne’e, Membru CPN-PD, Luis Mendes Ribeiro informa, estatutu permanente PD nian iha artigu 50 hateten, prezidenti partidu nian moras ka mate, automátikament asumi kedas nia posizaun sai hanesan prezidenti interinu. Depois maka hein fila fali kongresu nasionál maka bele hatene nia nafatin ka troka. (mj8)

Matadalan