Deskonfia Igreza Falsifika Dukumentus Ba Naturalizadu, Dom Basilio Husu Hatudu Evidensia

DILI - Deskonfia Parte Igreza halo falsifikasaun sertidaun Baptismo ba jogador naturalizadu. Ba problema nee Administrador Apostoliku Dioseze Dili Dom Basilio do Nacimento husu atu hatudu evidensia, hodi bele hatene los duni ka lae Igreja fo sarani Naturalizadu.

Administrador Apostoliku Dioseze Dili Dom Basilio do Nacimento katak, karik ema ruma iha provas konaba igreza fo sarani Naturalizadu maka tenke hatoo evidensia, atu nunee bele hatene kestaun nee los duni ka lae, maibe buat ida Naturalizasaun nee dehan ema seluk mai husi ninia rai, hakarak hetan nasionalidade iha TL maka tenke lori sertidaun baptismo husi sira nia rai duni.

Hau husu semak iha evidensia bele hatudu mai, karik iha amo Lulik balun maka halo falsifikasaun dukumentus nee karik bele hatudu Provas mai, atu nunee parte igreza bele hatene los semak halo buat sira nee, hau foin maka primeira ves rona problema Naturalizasaun nee,” informa Dom Basilio ba Jornalista sira, Tersa (24/11/2015) iha Salao Joao Paulo Comoro.

Nia informa liu tan katak, semak iha Evidensia konaba asuntu nee bele hatoo mai, atu nunee parte igreza bele hatene semak halo hanesan nee, karik iha Amo lulik ruma maka halo ema rai liur neebe la sarani iha nee, maibe halo sertidaun  baptismu, iha provas bele hatoo mai.

Antes nee Observador Politika Aniceto Cardozo hateten ema barak maka deskonfia katak ukun nain sira sogok igreza katolika balun iha Timor Leste (TL), fo sarani naturalizadu ho nia inan aman, nee igreza hamonu kredebelidade povu katolika TL. Informasaun kompletu iha STL Jornal no STL Web, edisaun Kuarta (25/11/2015). Madalena Horta/Lucia Ximenes

Suara Timor Lorosae