GASTÃO DE SOUSA: “PROJETU TASI MANE TENKI KONKURSU FOUN”

Ministru Obras Publika Transporte no Telekomunikasaun (MOP-TK) Gastão de Sousa afirma katak, se Tribunal de Kontas (TK) la aprova projetu Tasi mane tanba dehan Kompañia Hyundai husi Korea do Sul komete iregularidades ruma maka tenki halo fali konkursu foun ba projetu Tasi Mane.

Gastão de Sousa dehan, Projetu Tasi mane ne’e ba supply base. Suai Suply base maka sei iha Tribunal de Kontas, Governu halo resposta, no agora Governu hein, desizaun Tribunal ne’e oinsa.

“Se la aseita tenki konkursu foun fila fali, agora tenki hatene razaun tanba saida? Governu hato’o razoens ba ona, hein Tribunal de Kontas,” esplika Gastão Sousa ba Jornalista iha Ministerio   Solidaridade Sosial MSS Caicoli Segunda (23/11).

Kona-ba orsamentu pursentu balun dehan sei koa husi Kompañia Hyundai, Gastão de Sousa hatan nia parte la hatene ba asuntu refere.

Antes ne’e, Primeiru Ministru (PM), Rui Maria de Araújo hateten, Governu iha pontu de vista lobuk ida ona atu bele responde ba desizaun Tribunal de Kontas (TK) ne’ebé la aprova projetu Tasi Mane hanaran Suai Supply Base, ne’ebe manan husi Kompañia Hyundai.

“Governu sei responde ba desizaun ne’ebe maka Tribunal fo sai ne’e, Governu iha pontu de vista lobuk ida atu hato’o fila fali ba Tribunal,”esplika PM Rui Araújo ba Jornalista iha Palasiu Prezidensial, Sesta (20/11).

Antes   ne’e, Ministru Petroleum no Rekursu Naturais (MPRN) Alfredo Pires hateten, Tribunal de Kontas (TK) la aprova   projetu tasi mane (Suai supply base), tanba ne’e maka MPRN halo rekursu hodi kontra desizaun primeira instansia husi TK ne’e.

Nune’e mos nia dehan, prosesu konstruksaun Suai Supply Base   ne’e paradu hela, tanba TK la fo vistu, entaun Govenru sei rekore hela ba desisaun TK ne’e.

“Iha hela prosesu rekore nia laran, ita tenki hein lai desizaun husi rekore ne’e, tanba TK hapara tiha ona,”dehan Alfredo Pires.

Prontu selu projetu emerjensia

Nune’e mos, Ministru Obras Publika Transporte Komunikasaun (MOP-TK) Gastão Sousa hateten , Governu prontu ona atu selu projetu emerjensia ho $ 9 miloens ital mil, maibe tenki iha kontratu.

“Agora dadauk ami foin verifika 9 miloens ital, mas ami hetan tan adisional 4 miloens ami seidauk lori ba Konsellu Ministru atu aprova,”esplika Gastão Sousa ba Jornalista iha Ministerio   Solidaridade Sosial MSS Caicoli Segunda (23/11).

Maibe dadus ne’ebe maka tama ona, nia dehan, seidauk lori ba Konselhu Ministru (KM) atu aprova, não querdizer dadus ne’ebe maka lori ona uluk ba la’os la selu, maibe sei selu tuir fazeadamente.

Nia hatutan, ADN hatama ona dadus, maibe tenki iha profile husi kompañia, hafoin Comissão Nacional Aprozionamento (CNA) halo kontratu.Avi

Jornal Nacional