DIAK LIU COBRA REZIGNA HUSI FFTL

Vise Prezidenti Klube Atletiku Ultramar, Ano Gusmão, ho João Vieira (João Mintha), nudar eis jogador husu ba Vise Prezidenti Federasaun Futebola Timor Leste (FFTL) ba asuntus Estranjeirus, Aleixo Cobra, atu rezigna-an ona husi FFTL.

Ano Gusmão, senti estranhu oituan wainhira akompanha komentariu Aleixo Cobra nian iha media ne’ebe fo sai kona-ba iregularidade bar-barak iha FFTL.

“Hau duvidas tebes, tansa maka Aleixo Cobra foin loke ibun. Durante ne’e mos ema barak kestiona kona-ba iregularidades iha FFTL, maibe Aleixo Cobra defende maka’as los, mas agora maka foin loke ibun. Ba hau ida ne’e, ada udang di balik batu,” hateten Ano Gusmão ho hamanasa hodi responde JNDiario iha Hotel Timor, Sabadu (21/11/2015).

Ano Gusmão, fiar katak, iregularidades sira ne’ebe maka durante ne’e mosu iha FFTL, inklui problema jogadores naturalizasaun ne’e, Aleixo Cobra mos kontribui, tanba Cobra hanesan mos ezekutivu ida, liu-liu nudar Vise Prezidenti ba asuntus Estranjeirus nian.

“Fiar katak Aleixo Cobra nudar Vise Prezidenti trata asuntu estranjeirus mós hatene sasan sira iha FFTL nia laran ne’ebe durante ne’e tuir nia hatene la’o sabraut,” afirma Ano Gusmão.

Ano Gusmão afirma tan, wainhira mosu mal jestaun no iregularidades iha FFTL durante ne’e maka Aleixo Cobra ‘lekar’ ba publiku no halo presaun atu Prezidenti Francisco Kalbuadi Lay, rejigna-an husi FFTL karik, dala ruma bele konsidera. Ironia tebes, iregularidade ne’’e, tuir Aleixo Cobra, la’o kleur ona iha FFTL nia laran mas Aleixo Cobra mos falun diak los.

“Se Aleixo Cobra gentleman karik, durante ne’e nia hatene iregularidade iha FFTL nia laran, nia rasik husu rejigna-an husi FFTL. Maibe, realidade Aleixo Cobra kontinua hamrik iha FFTL no lao sai ba rai liur tuir inkontru internasionais sira no lori jogadores sira ba joga iha estranjeirus lori FFTL nia naran,” hateten Ano Gusmão.

Ano mos husu ba ezekutivu sira iha FFTL ne’ebe lidera husi Prezidenti Francisco Kalbuadi Lay, atu iha vontade halo ona kongresu nasional ba FFTL, tanba mandatu ba ezekutivu sira remata kleur ona.

Husi sorin seluk eis jogador João Mintha hateten, lolos ne’e Aleixo Cobra tenke hakmatek ou nonok ona, tanba nein kompriende lalaok futebol, mas asume ona kargu núdar vise Prezidente iha FFTL ba asuntus estranjeirus nian.

“Hau hakarak hatete deit, federasaun futebol iha nasaun hotu-hotu, uniku FFTL mak iha ninia vise presidente ne’ebé koalia lian Tetum la mós, Portugues no Ingles at liu tan ingles, maibé sorti bót tanba asume ona kargu vise prezidenti FFTL,” hateten João Mintha ho hamanasa.

João Minta relembra fali katak, iha tempu okupsaun Indonesia nian, nia ho Aleixo Cobra kaer bola hotu, maibe nia kaer bola tebe no Aleixo Cobra kaer bola guling (BG). Tanba ne’e, sorte boot hetan oportunidade husi Prezidenti Franicisco Kalbuadi Lay, hodi asumi kargu nudar vise prezidenti FFTL ba astuntus estranjeirus nian.

Jão Minta fo sasin katak, wainhira grupu AMANTE ho eis jogadores balun halo manifestasaun hasoru FFTL tanba komete iregularidades barak, maibe Aleixo Cobra mobiliza eis joventude klandestina ho veteranus sira halo konferensia imprensa boot iha FFTL nia oin hodi defende FFTL.

“Nusa mak Cobra foin hakfodak hodi kontra fali FFTL, ne’e signifika nia mós ida hotu, ou involve ba iregularidade no mal jestaun ne’e,” hateten João Minta.

To’o notisias ne’e hatun jornalista JNDiario halo ona esforsu atu hasoru Aleixo Cobra hodi halo kinformasaun mai nia la iha fatin. Nune’e, halo kontaktu liu husi telefone mas Aleixo Cobra la foti. ito

Jornal Nacional