FRETILIN, CNRT-PD SEI LAKON KONFIANSA HUSI POVU

Prezidente da Repúblika (PR), Taur Matan Ruak simu kritika maka’as husi povu kona-ba pensaun vitalisia, tanba Xefe Estadu ne’e rasik mak promete ona ba povu iha tempu kampaña hodi halo alterasaun ba lei pensaun vitalisia ne’e, maibé to’o agora seidauk iha rezultadu.

PR Taur Matan Ruak dehan, hatete ba povu katak, kuandu Parlamentu Nasionál la fó solusaun lalais ba pensaun vitalisia ne’e, sira sei lakon konfiansa povu nian iha eleisaun 2017.

“Se sira la muda, tinan 2017 besik ona, ema sei la hili tan sira (FRETILIN, CNRT-PD), tanba povu nia matan mos ona ho lei ne’e,”dehan Taur Matan Ruak, liu husi dialogu komunitaria ho povu Suku Gari-Uai, Postu Administrativu Baucau Villa, Munisipiu Baucau, Kuarta (10/12).

Xefe Estau ne’e fo ezemplu katak, hanesan eleisaun liu ba, maske partidu besik rua nulu, maibé povu hili de’it partidu 4 ne’ebé agora dada’uk asisti iha Parlamentu Nasional.

“Keta 2017 imi hili de’it rua karik, tanba imi matenek ona, tanba poder ne’e iha imi nia liman, imi mak hili imi nia lideransa sira,” katak Taur Matan Ruak.

Nia esklarese, Parlamentu Nasionál konkorda ona atu muda lei vitalisia ne’e, maibé bainhira mak muda, Xefe Estadu ne’e lahatene.

Taur Matan Ruak dehan, nia uluk se hanesan General mós, nia kontra lei ne’e, maibé Parlamentu mak orgaun soberanu ida ne’ebé mak bele muda lei ida ne’e.

Nia hatutan, Prezidente labele fo presaun ba orgaun Estadu nian ida atu halo lalais servisu, maibé ko’alia ba sira tenke ko’alia.

“Pensaun vitalisia imi la simu ne’e mak imi moe, maibé ema simu ne’e ema lamoe ida, ha’u mos dalaruma dehan, pensaun vitalisia ne’e halo ema ulun moras, tanba ha’u mos moe ho pensaun vitalisia ne’e, entaun ha’u agora mos lakohi simu ona pensaun vitalisia, tanba kuandu ha’u simu, entaun imi dehan, nia ko’alia de’it, maibé nia mos hakarak simu,” katak Taur Matan Ruak.

Xefe Estadu relata lia hirak ne’e, hodi responda ba komunidade Cesilia Freitas ne’ebé hatete katak, tinan 13 ona, ema balu bokur ho osan pensaun vitalisia.

“Tinan 13 ne’e ita sei nurak, maibé bainhira mak lei pensaun vitalisia ne’e bele muda. Keta hein bainhira deputadu sira riku hotu tiha no ministru sira riku hotu tiha mak foin muda karik,” lamenta Cecilia.

Nia hatuan, pensaun vitalisia ne’e, la merese ba ema sira ne’ebe uluk han hemu de’it iha rai liur hodi eskola, maibe to’o ikus mai sira nia moris mak diak liu fali.

“Ami husu atu pensaun vitalisia ne’e, fó ba ema sira ne’ebé mak uluk iha frenti armada no diplomatika, funu tinan 24 nia laran, la’os atu fo fali ba ema seluk,” relata nia.

Alende ne’e, komunidade Tomas Carmellu mós dehan, maske sira la simu osan pensaun vitalisia ne’e, maibé sira mo’e, tanba pensaun vitalisia ne’e, ema sira ne’ebé uluk lakohi ukun an mak hetan.

“Ami povu Gari-Uai mo’e, tanba ita bo’ot sira uluk funu tinan 24 iha ailaran la simu, Ida ne’e imi ukun na’in sira la mo’e maibé ami povu Gari-Uai mo’e, tanba pensaun vitalisia ne’e, ema seluk mak simu fali,” dehan nia.cos

Jornal Nacional