PLP REJISTU IHA TR HO APOIANTES 35.000

Partidu Libertasaun Popular (PLP), Kinta (10/12) hahú rejistu ona iha Tribunal Rekursu (TR), ho nia apoiantes ka asinantes hamutuk ema rihun tolu nulu resin lima (35.000).

Hafoin rejistu, portavos PLP, Andre da Costa (L-4) ba jornalista sira katak, loron 10/12/2105, komisaun instaladora PLP hakat mai iha TR hodi halo primeiru aktu formal hodi rejistu partidu ne’e tuir lei haruka.

Durante tinan balun, veteranus, simpatezantes, militante, juventude, estudantes, ativistas, dirijentes PLP halo esforsu no servisu bo’ot lubuk ida hodi halibur asinatura apoiantes husi Munisipiu 13, hanesan rekerimentu ida ba prosesu -rejistrasaun tuir lei haruka.

“To’o ohin loron PLP halibur ona total asinantes hamutuk 35.000, maibe Ministeriu Justisa hato’o mai ami katak atu rejistu agora sei bazeia deit ba lei antigu, ne’ebe ho bareira asinantes 1.500, nune’e ami kumpri lei ida ne’e no ami rejista ho lista asinantes hamutuk 1.500. PLP mos hato’o ona dokumentus seluk tuir lei haruka iha momentu ida ne’e ba TR, PLP fiar katak TR sei foti desizaun formal ida kona ba ezistensia legal PLP nian iha tempu badak,” hatete Portavos PLP L-4.

Iha oportunidade ne’e, portavos PLP ne’e mos la haluha fo agradesimentu ba apoiantes no saudasoens ba povu Timor-Leste laran tomak nia kontribuisaun, koperasaun, solidariedade no maturidade iha ambitu demokrasia ne’ebé hatudu ona iha funu naruk, rejistensia nia laran no prosesu dezenvolvimentu nasional.

L-4 hato’o mos respeitu ba ezistensia partidu sira ne’ebe oras ne’e dadaun iha asentu Parlamentu Nasional no mos ba partidu politiku seluk no foun sira ne’ebe namkari iha Timor-Leste.

L-4 hatutan, PLP konsiente katak oras ne’e la’os tempu kampanha, maibe PLP hakarak afirma katak PLP mosu atu loke espasu luan liu tan ba partisipasaun ativu povu nian, iha prosesu rekonstrusaun nasional iha rai doben Timor-Leste, buat balun la’o dadaun ona, maibe PLP fiar katak iha aspeitu barak husi presesu rekonstrusaun nasional inklui presesu dezenvolvimentu nian maka presiza kurizi no hadia.

PLP nia ekipa intelektual sira mos oras ne’e halo hela servisu hodi dezenvolve planu estratejika ne’ebe maka sei hato’o ba povu tomak wainhira tama ona iha tempu kampanha eleitoral 2017. PLP sei halo deklarasaun formal ba pubiku kona ba ezistensia PLP nian wainhira hetan ona desizaun husi TR.

Hafoin simu dokumentus husi PLP nian, Prezidente Tribunal Rekursu (TR), Guilhermino da Silva iha nia servisu fatin hateten, dokumentus sira ne’e simu no sei haree dokumentu sira ne’e.

Bainhira jornalista sira husu kona ba PLP ne’e nia Prezidente maka aktual Prezidente Repúblika, Taur Matan Ruak, L-4 hatan katak, ne’e nia lahatene. “Ha’u lakohi koalia ba ida ne’e,”dehan L-4 tan.

Tuir observasaun iha rejistu partidu PLP nian ne’e, portavos akompanha mos nia estrutura nasional no mos militantes partidu nian balun tan.Des

Jornal Nacional