HEINEKEN HUSU GOVERNU KONTROLA IMPORTASAUN SERVEZA ILEGAL

DILI — Manajer Jeral Heineken Timor, Vinay Mathur, husu ba governu liuhosi Ministériu Komérsiu Industria no Ambiente (MKIA) atu halo kontrolu ba importasaun serveza ilegal iha rai laran, tanba la kontribui taxa ba estadu, estraga saúde konsumidor sira nian, no estraga imajen Heineken nian iha merkadu.

Vinay Mathur hatete, apresia tebes ba polítika governu nian fó taxa naton ba kompania internesional sira halo investimentu iha Timor. Heineken konsidera polítika governu nian ne’e hanesan oportunidade di’ak tebes ba Heineken halo investimentu ho kualidade di’ak liu iha Timor.

“Ami kontente los ho insentivu ne’ebé governu fó, i ami hatene ke iha marka seluk halo negósiu paralelu (ilegal). Situasaun ne’e la respeitu regras ke governu kria, ne’e Heineken hakarak governu ho sériu halo kontrolu iha merkadu,” subliña Vinay Mathur ba Timor Post iha nia servisu fatin Timor Plaza, Sesta (11/12).

“Produsaun Heineken iha Timor, iha ema enjineiru ke kontrola álkohol no tau atensaun maka’as ba prazu serveza nian. Tanba ne’e, Heineken preokupa, tanba atividade ilegal nunka preokupa seguransa ba ema nia saúde.  Se governu la tau atensaun ba kontrolu importasaun ilegál maka bele estraga konsumidor sira nia saúde no estraga mos imajen Heineken nian,” hatutan Vinay Mathur.

Heineken hetan ona lisensa hosi governu ba investimentu internasional iha Timor Leste ho valor investimentu dólares Amérika rihun 40.

Heineken hahú ona halo kontruksaun ba edefísiu fábrika iha Metinaru-Dili, ne’ebé tuir planu sei hahú fábrika iha fulan Novembru 2016, no sei involve timoroan nain rihun ida inklui servisu nain direitu ka servisu iha fábrika laran hamutuk atus rua (200), no indireitu ka servisu iha parte distribuisaun hamutuk ema nain atus ualu (800).

Vinay Mathur mos husu atu governu kontrola mos nivel álkohol ba serveza hotu iha rai laran, tanba Heineken mantein ho komitmentu ida hamutuk ho povu Timor atu asegura produsaun ne’ebé ho kualidade di’ak no kuidadu tebes ho seguransa saúde konsumidor sira nian.

Kona-ba involvimentu timoroan iha fábrika, Heineken haruka ona timoroan nain 50 ba tuir formasaun iha Indonézia atu aprende liuliu kona-ba koñesimentu ba produsaun, aprede kona-ba kualidade servisu no atetude servisu. Formasaun ne’e durante fulan neen (6) too fulan sia (9). Formadu sira remata formasaun iha Indonézia fila mai Timor sei fahe tutan fali ba timoroan seluk ne’ebé servisu iha Heineken.

Provizoriamente Heineken halo importasaun ba serveza ne’ebé Heineken rasik mak produz mak hanesan, Serveza Heineken rasik, Beer Bintang, Tiger, ABC, Sagres no tuir planu bainhira hahú ona fábrika iha Timor sei investe mos serveza lokal.

Iha oportunidade entrevista ho Timor Post, Vinay Mathur mos fó mensajen ba konsumidor Heineken hotu atu hemu serveza para diverte ho responsabilidade no sosializasaun.

Prezensa Heineken iha Timor la’ós konsentra de’it ba investimentu, maibé mos fó apoiu ba atividade desportivu ne’ebé hala’o iha rai laran.

Hafoin assinatura akordu investimentu ho governu iha loron 8 fulan Janeiru 2015, Heineken fó apoiu ba kurrida bisikleta Tour de Timor, Serveja Heineken fó apoiu ba Liga Futebol Amadora ho serveja Bintang, apoiu ekipa Rugby hosi Sport Dili i Benfica iha partisipasaun Torneiu Bali no atividade deportiva seluk.(cão)

Timor Post