ANICETO GUTERRES ‘ABANDONA’ REUNIAUN LIDERES BANKADA – CNRT LA KONTENTI HO VICENTE

Xefi Bankada Parlamentar FRETILIN, Aniceto Guterres, Kuarta (04/05/2016), abandona hela reuniaun lideres bankada Parlamentares tanba la satisfeitu ho deklarasaun balun husi Prezidenti Parlamentu Nasional (PN), Vicente Guterres.

Vicente Guterres, foin lalais, ne’e hateten dehan, deklarasaun ne’ebe Aniceto haktuir iha planaria la reprezenta bankada FRETILIN, tanba ne’e halo Aniceto, la kontenti ho prezidenti PN.

“Hau walk out husi konferensia lideres bankadas, tanba Prezidenti Vicente Guterres hateten hau dehan, deklarasaun ne’ebe mak hau reprezenta bankada FRETILIN katak FRETILIN lakon konfiansa ba nia ne’e nia dehan hau reprezenta hau nia pesoal la presiza FRETILIN tomak ida, entaun hau ba tur iha ne’eba hau lareprezenta bankada FRETILIN hau ba tur iha konferensia lideres bankadas atu hola desizaun oinsa, ne’ebe diak liu hau sai, mas hau tama tiha mak hau sai fali,” hateten Xefi bankada FRETILIN, Aniceto Guterres ba Jornalista sira iha uma fukun PN, Kuarta (04/05/2016).

Kona-ba eleisaun meja foun PN ne’ebe kontinua adia, Aniceto esklarese katak, nia rasik la hatene razaun saida maka eleisaun ne’e kontinua adia.

“Hau la hatene, tanba saida mak adia tan, tanba hau la partisipa konferensia lideres bankada, maibe FRETILIN apoia totalmente apoia mudansa iha meja PN, katak mudansa tenke iha, se la iha ona konfiansa tenke halo mudansa duni,” dehan Aniceto Guterres.

Liu husi konferensia lideres bankadas parlamentar CNRT, FRETILIN, PD no Frenti-Mudança, horseik, deside adia nafatin diskusaun ba distituisaun Prezidente PN, Vicente Guterres no eleisaun ba meja PN foun.

Ho adiamentu ne’e, Xefi Bankada CNRT, Natalino dos Santos, konsidera Vicente Guterres, lakohi atu husik hela kadeira prezidenti PN nian.

“Ami bele konsidera nia (Vicente-red)lakohi tun no lakohi husik kadeira mahar ne’e, maibe hakarak ka lakohi kadeira ne’e tenke husik duni iha tempu badak nia laran,” afirma Deputaud Natalino os Santos iha PN.

Nia informa katak, eleisaun meja PN ne’e adia tanba Prezidenti Vicente Guterres, hakarak lee hotu artigu sira iha rezimentu ne’e nia laran mak foin bele asina, maibe iha substansia alterasoens ne’e iha deit artigu 15 no 19.

Iha fatin hanesan, Adriano do Nascimento, membru Bankada PD, hateten mos katak, eleisaun ne’e adia, tanba rezimentu ne’e foin hatama ne’ebe sei fotokopia hodi fahe ba deputados sira.

“Hau fiar, Kinta ohin (5/5/2016), bele konsege ona halo eleisaun, tanba liu husi enkontru lideres bankada deside ona, rekerementu ne’e tenke aprova no asina lai mak bele kontinua bele halo eleisaun,” dehan Adriano atual Prezidente PD.

Adiamentu ne’e ba dala rua ona, tanba ne’e maka bankada CNRT no FRETILIN husu atu lalais ona, tanba tenke halo duni ba mudansa hodi nun’ebe labele perturba aktividade PN nian. mia

Jornal Nacional – 05.05.2016