Antigu PR timoroan Ramos-Horta hatete katak Guiné Ekuatorial la halo progresu barak

Antigu Prezidente timoroan José Ramos-Horta konsidera katak Guiné Ekuatorial ladún halo "progresu barak" hahú hosi momentu tama iha Komunidade hosi Nasaun sira Lian Portuges (CPLP), iha tinan rua liubá, no defende katak organizasaun tenki hatudu "pasiénsia maibé firmeza".

"Ladún iha progresu barak hodi hatán ba espetativu sira hosi CPLP", hatete hosi Ramos-Horta, antigu Prezidente (2007-2011) no primeiru-ministru (2006-2007) Timor-Leste nian ba Lusa.

Ba Nobel Dame nian (1996), "Guiné Ekuatorial tenki hatán ba espetativu sira hosi CPLP no hosi komunidade internasional nian, iha nia interese rasik ba evolusaun pozitivu no pasífiku hosi situasaun iha Guiné Ekuatorial".

Guiné Ekuatorial tama ona iha CPLP nu'udar membru plenu direitu iha loron 23 Jullu 2014, iha simeira ne'ebé akontese iha Díli no bainhira Timor-Leste asumi prezidénsia rotativu hosi organizasaun nian. Adezaun preve respeitu ba "roteiru" ida ne'ebé inklui adiamentu ba kastigu mate nian, hodi bele halakon kastigu ne'e, promosaun ba lian portugeza no demokrasia ne'ebé di'ak liu.

José Ramos-Horta lamenta ona katak, hafoin tinan rua adezaun nian, autoridade sira hosi Malabo seidauk halakon kastigu mate nian.

"Ami kontra total kastigu mate nian. Timor-Leste labele simu nasaun ida CPLP nian ne'ebé sei iha kastigu mate nian. Di'ak liu iha adiamentu ida maibé tenki halakon hosi Konstituisaun Guiné Ekuatorial nian", nia hatutan.

Hatán kona-bá saida maka CPLP bele halo hodi akompaña membru foun ne'e, Ramos-Horta hatete katak tenki halo "ho pasiénsia, ho firmeza".

Antigu governante timoroan fó hanoin katak relasaun entre Estadu sira eziji kestaun espesial ida no CPLP "iha nia dalan rasik hodi halo buat sira, nia mekanizmu sira, no dalaruma ladún produtivu liu maibé la loos".

"Ha'u iha esperiénsia ne'e iha tinan barak nia laran. Bele hanesan laiha impaktu maibé iha daudaun, liuliu bainhira abordajen sira halo ho delikadeza maibé ho firmeza", nia hatutan.

Ramos-Horta hili hosi sekretáriu-jeral ONU nian, Ban Ki-moon, nu'udar nia reprezentante iha Guiné-Bissau, funsaun sira ne'ebé nia kaer to'o iha tinan liubá.

Antigu prezidente timoroan hili hosi prezidénsia timoroan nian nu'udar reprezentante espesial CPLP ba Guiné-Bissau no Guiné-Ekuatorial nian maibé nia admiti ona katak la konsege "akompaña besik" nasaun ne'e tanba simu mós prezidénsia hosi Painel Independente hosi Nível Aas ba Operasaun sira Dame nian.

SAPO TL ho Lusa