XANANA: SETOR PRIVADU LALIKA HANOIN DEIT OSAN

Ministru Planeamentu Investimentu Estratejiku (MPIE), Kay Rala Xanana Gusmão, husu ba setor privadu lalika hanoin konta deit osan, maibe tenke organiza an atu priense dezenvolvimentu rai ida ne’e nian.

“Ha’u husu ba  setor  privadu lalika konta deit osan, ida ne’e  importante teb-tebes, ha’u husu  setor privadu atu organiza a’an  hodi  haree ba oportunidades dezafius  nesesidades, ”esplika Xanana Gusmão liu husi enkontru  setor  publiku no setor privadu iha Suai Gala Room,  Kuatru Piso do Timor Plaza, Dili, Kuarta (20/07).

Iha enkontru ne’e mos partisipa husi setor privadu sira kuaze husi Munisipiu hotu-hotu.

Eis Primeiru Ministru Xanana Gusmão mos hatete, Governu no setor privadu nu’udar parseiru ba dezenvolvimentu.

“Ami sei  treina sira matenek liu,  depois imi fali (setor privadu) kria empregu, kria aktividades, ne’e maka ita parseiru  ba dezenvolvimentu, la’os ba dehan maun ha’u araska los ne’e,  ida  ne’e la’os parseria,”dehan Xanana.

Xanana Gusmão hatutan, parseria ba dezenvolvimentu Governu prepara buat hotu, tanba  ne’e maka atu dehan formasaun skill husi Sekretaria Estadu  Politika Formasaun Profesional Empregu  (SEPFOPE)  ne’e importante tebes no tenke hasa’e liu tan.

“ita nia labarik sira ba Londres ba   Inglatera ba fokit manu fulun,  imi sira nia  problema,  balun seidauk S1,  balun semester enam (Nen) hanoin labele ona, tanba universidade selu  karun teb-tebes, dosente sira la tama hanorin, maibe karun hela deit,”dehan  Xanana.

Eis Prezidente Republika Xanana Gusmão mos afirma,  setor privadu parseiru ho Governu ba dezenvolvimentu maka nasaun ida bele avansa lalais ba oin.

“Ita fahe tarefas, ami kria nafatin, imi bolu la’o, ida ne’e  maka favor ida ita bo’ot sira haree tok ba diksuti didiak, la’os dehan ohin ne’e ita bo’ot sira sai hotu, fo hela pasu para loron seluk  ita diskuti,  ne’ebe ha’u senti katak, ha’u bolu hela atensaun hanesan ne’e ba  ita bo’ot sira,”tenik Xanana.

Promulga OR

Nune’e mos, setor privadu nasional tau esperansa boot ba Prezidenti Republika (PR), Taur Matan Ruak, atu bele promulga lalais Orsamentu Rektifikativu (OR) ho montante US$ 390,7 milhoens.

Husi montante OR ne’e sei ejekuta no responde ba nesesidades mega projetu rua, maka hanesan konstrusaun Porto Tibar ho mos projetu Suai Supply Base. Maibe, kuaze 70% husi OR ne’e sei aloka ba selu dividas ne’ebe Governu halo ba seitor privadu nasional.

Seitor privadu nasional sira espera katak, PR Taur bele uza nia nosaun atu promulga OR ne’e hodi legaliza Governu selu dau-daun ona tusan ba seitor privadu nasional sira. Se lae, seitor privadu nasional sira balun-balun tenke taka tanba la iha ona osan atu sustentabiliza ninia vida empreza.

Problema klasiku ne’ebe sai obstaklu boot ba dezenvolvimentu setor privadu nasional maka mukit liu finanseira. La iha instituisaun finanseira ida maka bele loke matan ba setor privadu sira nia halerik  atu bele hetan fasilidades kreditu. Ho nune’e, setor privadu nasional laran metin deit ba setor publiku, liu husi projetu fiziku Estadu nian para sira bele hetan osan oituan hodi halo fali reinvestimentu no fo kampo servisu ba maluk Timor oan sira.

Iha tinan tolu nia laran (2013-2016), Governu autoriza seitor privadu sira ejekuta obras fiziku lubuk ida ne’ebe kontribui ba dezenvolvimentu nasional, maibe maioria husi projetu fiziku sira ne’e Governu seidauk selu. Tanba ne’e, sira espera ba Prezidenti Republika bele promulga para fo fali ki’it ba setor privadu sira ne’ebe sira nia osan no kapital investe hotu ona ba projetu fiziku, hanesan estrada, ponte, repartisaun Estadu nian, drainazen, irigasaun, eskola ho projetu eletrisidade nian.

Ho dividas ne’ebe Governu halo ba seitor privadu, liu-liu hirak ne’ebe ejekuta ona projetu fiziku Estadu nian no hirak ne’ebe halo pojetu investimentu ba Estadu, moris hela iha tusan letan no balun kuaze taka tiha ona sira nia empreza, tanba Governu seidauk selu sira maske sira finaliza ona projetu sira ne’e.

Husi sorin seluk, Ministru Estadu Cordenador Asuntu Ekonomia (MECAE), Estanislau Aleixo da Silva, rekonhese katak, setor privadu hanesan motor dezenvolvimentu, motor ba kriasaun empregu e rikeza iha rai laran.

‘’Governu agora haree mekanismu oinsa maka atu bele kria kondisaun para setor privadu bele hetan asesu ba kapital finanseiru,’’ afirma Ministru Estanislau Aleixo da Silva ba jornalista sira, wainhira partisipa iha reuniaun meja redonda ho seitor privadu  iha Timor Plaza, Kuarta (20/7/2016).

Nia hatete, ida ne’e laos servisu ne’ebe fasil, tanba ne’e presiza kontribuisaun ema hotu nian, tanba ne’e tuir ministru ne’e iha reniaun meja redonda ne’e bele fo oportunidade ba setor privadu sira hato sira nia preokupsaun ba Governu nune’e Governu bele toma atensaun.

‘’Hau mos hakarak apelhu ba setor privadu sira bele iha kapasidade inisiativa para halo investimentu iha area no oportunidade ne’ebe iha,’’ koalia Estanislau.

Nia haktuir, setor privadu mos tenki iha koragen hodi identifika area investimentu oinsa servisu hamutuk ho Governu hodi dezenvole rai laran. avi/nia

Jornal Nacional