KLEJOTAMO Kondena Maka’as ba Hahalok Autor Tuda Bomba Marotok ba kareta PNTL Munisípio Bobonaro iha Kuartel Jeral Maliana nian

Komunikadu Imprensa

KLEJOTAMO Kondena Maka’as ba Hahalok Autor Tuda Bomba Marotok ba kareta PNTL Munisípio Bobonaro iha Kuartel Jeral Maliana nian

KLEJOTAMO - Klibur Estudante no Joventude Tapo/Memo-Oan, Posto Administrativu Maliana, Munisipiu Bobonaro kondena maka’as ba hahalok ka atitude krime organizadu ne’ebé mak soe bomba Molotov (marotok) ba kareta PNTL-Polisia Nacional Timor-Leste iha Kuartel Jeral Maliana hetan atake husi ema deskoñesidu balun. Iha ne’ebé kazu ne’e akontese iha fulan Juñu liubá, ba kazu ida ne’e tuir KLEJOTAMO nia hare’e hahalok ida ne’e ema deskoñesidu ne’ebé halo ne’e imoral tebes no kontra Lei KPTL-Kódigu Penál Timor-Leste nian, artigu 210 Atentadu ba Siguransa iha Transporte, númeru 1. Ema ne’ebé pratika faktu adekuadu atu halakon ka hamenus seguransa iha meiu ba transporte no, nune’e, hamosu perigu ba ema seluk nia vida ka integridade fizika sei hetan pena prizaun tinan 2 too tinan 8. Joint ho artigu 251, artigu 252 no 266 kona-ba Krime hasoru patrimóniu no hasoru patrimóniu em jerál iha KPTL.

Husu ba sidadaun hotu-hotu atu fó kontribuisaun ba paz hodi nune’e prosesu dezenvolvimentu iha nasaun Timor-Leste bele la’o iha ita nia Munisipiu sira. Hahalok ida ne’e krime organizadu tebes ba sa Polisia Nacional Timor-Leste iha Kuartel Jeral Maliana labele kaptura autor refere ne’ebé tuda bomba marotok ne’e. Husu ba PNTL iha Kuartel Jeral Maliana atu servisu makas ho profesional liu tan iha futuru mai.

Tuir mai, KLEJOTAMO rekomenda katak:

Rekomenda ba Komandante PNTL Munisipio Bobonaro Superientendente Xefe Armando Monteiro atu servisu hamutuk ho Administrador Munisipiu Bobonaro, Posto-Administrativu Maliana, Bispo Diocese Maliana, lider autoridade lokal hodi nune’e autor ne’ebé mak soe bomba molotok seidauk entrega an bele kaer lalais.

Rekomenda ba Komandante Jerál PNTL Komisáriu Julio da Costa Hornay atu aumenta tan Polísia sira iha UPF-Unidade Patroliamentu Fronteira iha Maliana, postu UPF Tunubibi, Posto UPF Tapo/Memo besik mota Malibaka, no Postu UPF Kalohan iha Suco Saburai hodi nune’e reforsa tan ekipamentu servisu ne’ebe mak presiza.

Rekomenda Parlamentu Nacional ba Komisaun B asuntu Defeza no Siguransa Nacional atu halo fiskalizasaun hodi tunba baze atu haree kondisaun eskuadra PNTL sira iha kada munisipiu liu-liu iha fronteira terestre sira se lae hafasil ema hatama Droga mai TL no buat seluk-tan.

Rekomenda ba Governu liu-liu Ministeriu Interior haforsa tan Intelejensia Timor-oan nian, no tenke servisu hamutuk ho INTERPOL hodi nune’e bele kaer autor ne’ebe soe bomba marotok, sekarik autor ne’e halai ona ba rai liur estranjeiru.   

Atu hetan informasaun kle’an liu kona-bá asuntu ne’e bele kontaktu:

Moisés Vicente, Abrão Gomes, Klaudino Kolo, Roque Anfonso no Isabel Gomes

Porta voz KLEJOTAMO, Telefone: +670 77291406 no +670 77369706