Prezidente mosambikanu hatete ba mediador internasional sira katak iha urjénsia iha dame

Prezidente mosambikanu, Filipe Nyusi, iha loron-kuarta ne'e fó korajen ba mediador internasional sira hodi tulun Governu no Renamo hodi hakotu ho konfrontu militar sira, hodi hatete katak povu iha urjénsia atu nasaun bele hetan fali dame.

"Knaar determinante maka hosi imi, atu fasilitasaun [ne'ebé sei halo hosi mediador sira] bele ajuda hetan solusaun ida tuir espetativu hosi populasaun, hodi labele kontinua mate", Nyusi afirma bainhira ko'alia iha nia gabinete serbisu nian ho mediador internasional sira hosi diálogu entre Governu ho Rezisténsia Nasional Mosambikanu (Renamo) ba restaurasaun dame nian iha nasaun laran.

Destaka katak povu maka tenki hanesan vensedór hosi prosesu negosial atual, Filipi Nyusi afirma ona katak negosiasaun entre Governu ho partidu prinsipal opozisaun nian tenki hetan dame definitivu ida iha Mosambike.

"Atu bele konklui kedas "dossier" ne'e, hodi nune'e investimentu sira kontinua iha vantajen ba dezenvolvimentu ekonómiku no sosial nasaun nian, hodi ita labele estraga tempu no forsa sira", nia hatete.

Iha deklarasaun sira ba jornalista sira, bainhira hakotu reuniaun ho xefe Estadu, italianu Mario Raffaelli, mediadór ida entre mediador na'in rua ne'ebé hatudu hosi Uniaun Europeia (UE) no ne'ebé xefia ekipa mediasaun hosi Akordu Jeral Dame 1992 nian iha Mosambike, konsidera ona enkontru ho Filipe Nyusi hanesan pozitivu, maibé nia lakohi hanaruk komentáriu sira kona-ba prosesu negosial nian.

"Imi hatene katak ha'u iha esperiénsia maka'as iha negosiasaun dame nian maibé ha'u sei la halo deklarasaun sira, enkontru ho Prezidente hanesan pozitivu", afirma hosi Raffaelli.

Uniaun Europeia (UE) indika mós Angelo Romano, hosi Komunidade Santo Egídio, instituisaun ne'ebé, iha tinan 1992 iha Roma, halo ona mediasaun ba Akordu Jeral Dame nian, ba negosiasaun foun sira entre Governu mosambikanu ho Renamo.

Aleinde UE, prosesu negosial atual konta mós mediasaun hosi Igreja Katólika - liuhosi núnsiu iha Maputu, Edgar Peña no hosi sekretáriu Konferénsia Episkopal Mosambike nian (CEM), João Nunes -, hosi eis-prezidente Botsuana Quett Masire, hodi reprezenta Fundasaun ba Lideransa Global, ho sede iha Londres, hosi reprezentante ida hosi Fundasaun Faith ne'ebé diriji hosi eis-primeiru-ministru britániku, Tony Blair, no hosi reprezentante ida Governu Áfrika-Súl nian.

Maski hosi parte rua restabelese negosiasaun sira, atake sira hosi mane armadu sira karik hosi Renamo ba karreta sivil no militar sira iha fatin oioin iha sentru nasaun nian akontese beibeik no movimentu akuza Forsa sira Defeza no Seguransa nian hosi aumenta bombardeamentu iha ai-laran Gorongosa, ne'ebé karik hanesan fatin subar hosi Afonso Dhlakama nian.

Partidu prinsipal opozisaun nian lakohi aseita rezultadu sira hosi eleisaun jeral sira tinan 2014 nian no ameasa kaer governu iha provínsia neen ne'ebé sira reivindika vitória eleisaun nian.

SAPO TL ho Lusa