Konstrusaun Igreja Gasta ho Millaun $2,475,137,7

GLENO, (ANTIL) – Igreja Nossa Senhora da Graça Gleno ne’ebé inaugura iha loron 10 fulan-agostu 2016, konstrui ho totál orsamentu millaun 2,475,137.7.

Prezidente Joint Venture, Fernando Quintão Casimiro ba ANTIL, Tersa, (9/8) hatutan, konstrusaun igreja ne’ebé ho nia medida 80×40 ne’e, konstroe hosi kompañia Joint Venture kompostu hosi Rilero Unipessoal Lda, Katina Moris Hakmatek Unipessoal Lda, Biamal Unipessoal Lda, Altarico Unipessoal Lda, Lorica Star Unipessoal  Lda, Ulumasi Unipessoal Lda no Sare Unipessoal Lda.

Prezidente Joint Venture hatete, inísiu konstrusaun ne’e, sira buka fundu hosi sarani sira hodi hahú nia fondasi no depois iha 2013 hetan aprovasaun orsamentu hosi governu.

”Kontinuasaun ba konstrusaun hahú iha tinan fiskál 2013, hafoin hetan apoiu  dahuluk  hosi governu ho totál 500 mil dolar no iha tinan 2014, ami simu 500 mil dolar tan no iha tinan 2016  hetan totál orsamentu  $475, 137,77”, informa.

Hosi totál orsamentu ba konstrusaun hafahe ba tolu hanesan, ba dezeñu ho supervizaun hosi tékniku sira ho $168,907, ba kontijénsia ho taxa $194, 892,73 no orsamentu konstrusaun, hamutuk millaun $1, 956, 675, 22.

 Nune’e amu Pároku Ermera, Ricardinho Mendonça,  hateten, ho kostrusaun ida ne’e, maski jardin ho resintu igreja seidauk hotu, maibé importante mak bele uza uluk ona atu sarani sira bele halo orasaun.

Kona-ba konstrusaun igreja nia, Amu pároku hatutan, kontribuisaun boot liu mai hosi governu no sarani fó tuir buat ne’ebé sira bele. (jornalista: Maria Freitas; editora: Rita Almeida)

Foto: Prezidente Joint Venture, Fernando Quintão Casimiro. Foto ANTIL/Maria Freitas