KONA-BA RIKU SOIN TASI TIMOR, DOM VIRGÍLIO LAKOHI EMA BALUN DEIT MAK GOZA

Riku soin povu Timor nian iha tasi Timor ne’ebe dau-daun ne’e povu luta maka’as atu bele hetan determinasaun ba demarkasaun linha fronteira maritima, la bele benefisia deit ba ema ida ka rua, maibe povu tomak to’o area rurais  iha direitu atu goza mos.

Lia hirak ne’e hato’o husi Bispo Diocese Dili, Mgr. Virgilio do Carmo da Silva, SDB, hodi responde JNDiario iha Igreja Motael, Dili, Tersa (9/8/2016).

Dom Virgilio husu ba Governu ne’ebe hetan fiar husi povu atu ukun para tau interese povu nian as liu interese hotu-hotu, tanba ne’e,   tenki  jere  didiak  riku  soin  Timor  nian  hodi  fó  benefisiu  ba  povu  sira  to’o  iha  area  remotas.

“Ita haree povu ne’e iha ispiritu patriotismu ida bot tebes hodi hamrik halo manifestasaun kontra Governu Australia. Labarik ki’ik, jovens, estudantes no ferik-katuas sira, sakrifika sira nia tempu no kbi’it tuun ba estrada halo manifestasaun. Tanba ne’e, wainhira rezultadu iha la bele ema ida-rua deit maka goja riku soi iha tasi Timor,” afirma Dom Virgilio do Carmo da Silva.

Dom Virgilio sublinha katak, la bele ema hotu tuun ba hakilar hodi defende tasi Timor, maibe nia rezultadu benefisia deit ema ida ka rua no grupu balun deit.

Nia lia tun tan dehan, bainhira situasaun sira fronteira maritima la’o tuir nia dalan, maka Governu tenke hanoin para jere riku soin sira iha tasis laran ba povu nia diak. La bele ba deit povu ne’ebe iha nasional, maibe ba moos povu ki’it laek no lia laek sira iha area remotas.

“Igreja Katoliku no ami Bispo sira mos apoiu total ba luta povu nian hodi determina lejimidade demarkasaun fronteira maritima Timor Leste ho Australia. Apoiu no apresia tebes ba esforsu hotu ne’ebe halo husi negosiador prinsipal fronteira maritima, Sua Exelençia Kay Rala Xanana Gusmão ho nia ekipa,” hateten Dom Virgilio.

Nia apresia tebes ho vontade politika dialogu ne’ebe Governu Timor Leste hatudu iha mundu internasional atu solusiona deputa fronteira maritima ho Australia.tos

Jornal Nacional