TL Apoiu Portugal La’os Selu Favór

DILI, (ANTIL) – Ministru Planeiamentu no Investimentu Estratéjiku, Kay-Rala Xanana Gusmão hateten, Governu Timor-Leste (TL) apoiu Governu Portugal ho orsamentu montante €2 Milliaun la’ós selu favór maibé apoiu solidariedade.

Apoiu ida ne’e relasiona ho akontesentu inséndiu iha Portugal, fulan ida ne’e, ne’ebé halo terus ona populasaun barak.

Uluk iha tempu rezisténsia, nasaun oi-oin inklui Portugal apoiu buat barak ba Timor nia luta. Tan ne’e, tuir Xanana, TL iha dever apoiu fali Portugal.

“Ita fó resposta di’ak ba solidariedade ne’ebé uluk ema hatudu ba ita,” nia dehan perante membrus no ofisiais F-FDTL iha Kuartel Jenerál F-FDTL Fatuhada, Dili, Kuarta, (10/8).

Nia hatutan, TL la’os de’it apoiu Portugal maibé ajuda ona nasaun sira seluk hanesan Estadus Unidus Amérika, Haiti, Xina, Japaun, Thailándia, Indonézia, Illa Pasífika, Vietnam no Afrika.

Ba futuru, tuir nia, invés apoiu de’it ho osan, maibé TL liu-hosi F-FDTL tenki diretamente ba nasaun balun ne’ebé presiza tulun.

“Ita ba hanesan militár ba ajuda hodi hametin relasaun povu ninian no militares ho militares. Ne’e maka dehan nasaun amigu,” eis líder rezisténsia ne’e tenik.

Eis Komandante FALINTIL rekuñese katak durante ne’e forsa F-FDTL kolokadu iha nasaun balun maibé ne’e la’ós ba apoiu maibé ba apriende.

“Dala-ruma haruka forsa ida-rua ba Sudaun no haat-lima ba Libanon, ita senti kontenti ona tanba ita ba partisipa. Ne’e la’ós ba partisipa maibé ne’e ba apriende,” Xanana realsa ho oin siak no lian hakilar. (jornalista: Xisto Freitas; editora: Rita Almeida)

Foto: Ministru Investimentu no Planeiamentu Estratéjiku, Kay-Rala Xanana Gusmão, kaer liman ho Maijór Jenerál Lere Anan Timur, molok nia (Xanana) husik hela Kuartel Jenerál F-FDTL atu fila hikas ba ninia kna´ar fatin, Kuarta (10/8). Foto ANTIL/Xisto Freitas

Lee mos iha ANTIL

http://antil.tl/f-fdtl-hetan-apoiu-ekipamentu-obras-publikas/