Papel Sosiedade Sivil Mak Tau A’as Interese Povo

DILI, (ANTIL) – Kontribui iha prosesu dezenvolvimentu, solidaridade hosi sosiedade sivil sira importante atu hatudu, hodi fó hanoin estadu ne’e tau matan ba interese povo, duke interese poder polítika no ekonomia.

Yeni Rosa Damayanti nudar ativista reformasaun iha Indonézia ba jornalista ANTIL, foin lalais ne’e iha Sentru Kovensaun Dili, katak, dezenvolvimentu sosiedade sivil iha Timor-Leste la’o di’ak. Tanba ne’e, direitu povo iha área oin-oin presiza toma konsiderasaun.

Sosiedade sivil TL ne’ebé haree ba asuntu violasaun direitus umanus, preokupa ba nomeasaun Wiranto iha strutura governasaun Prezidenti Repúblika Joko Widodo akontese mos iha Indonézia.

Rosa Damayanti dehan, pozisaun hodi la-konkorda, tanba lakohi atu repete tempu pasadu hodi limita liberdade iha espresaun.

Ativista reformasaun ne’e hatutan, mesmu liberdade espresaun iha Indonézia la’o di’ak, maibé hanoin sira ne’ebé sosiedade sivil sira hato’o hanesan anin no la-tau iha konsiderasaun.

Buat barak, nia dehan, presiza nafatin luta hosi sosiedade sivil sira, tantu Indonézia no TL mak la’ós de’it direitu sivil no polítika, maibé importante mos ekonomia, sosial no kultura hanesan direitu agrikultór sira, traballadores, ema ho defisiensia, no seluk tan.

Hirak ne’e, ativista ne’ebé apoiu Timor ba ukun rasik-án hatutan, direitu sira ne’e sosiedade sivil Indonézia no TL presiza atu hametin liu-tan.

Membru ba organizasaun nasaun sudeste aziatiku, Rosa akresenta, idaidak ho ninia esperénsia no diferénsi iha implementasaun polítika estadu ba prosesu dezenvolvimentu kada nasaun ida nian.

Indonézia, katak nia, sosiedade sivil sira pelumenus ho liberdade espresaun. Mais, buat ne’ebé esensial ba povo hotu mak labele atu para ko’alia no sai kontrolu sosial iha prosesu dezenvolvimentu nasaun.

“Ezemplu, kuandu la-hatun Soeharto, reformasaun sei la-akontese iha Indonézia, nune’e mos Timor-Leste la-luta ba ukun rasik-án, to’o agora seidauk bele sente saida mak independensia”, katak nia.

Nia akresenta, interférensia la-akontese iha nasaun ba membru ASEAN, maibé livre iha sosiedade sivil atu hato’o hanoin no opiniaun ba lalaok ne’ebé mosu, bainhira mosu naksalak ruma iha desizasaun polítika ba povo nia moris di’ak.

Tuir nia haree, dezenvolvimentu sosiedade sivil iha rai laran la’o di’ak, tanba organizasaun ne’ebé toma konta ba asuntu feto mos komesa barak. Hodi hatutan, apresia, tanba TL bele hametin demokrasia ho di’ak. (jornalista : Rita Almeida; editor : Otelio Ote)