Republikanu
na'in 50 ne'ebé kaer knaar importante sira iha seguransa nasional
norte-amerikanu hala'o denúnsia iha loron-segunda ne'e ba ignoránsia no
inkompeténsia hosi kandidatu ba White House partidu nian, Donald Trump,
konsidera katak sei hanesan "prezidente perigozu liu iha istória"
nasaun nian.
Denúnsia
ne'e halo liuhosi karta aberta ida ne'ebé signatáriu sira serbisu ona iha White
House, iha Departamentu Estadu nian ka iha Departamentu Defeza nian, ba
prezidente republikanu sira, hosi Richard Nixon to'o George W. Bush.
La
apela ba votu iha kandidata demokrata, Hillary Clinton, sira hakerek loloos,
iha karta ne'ebé publika hosi jornal The New York Times, katak laiha ema ida
hosi sira maka sei vota iha Donald Trump.
Signatáriu
sira deklara ona katak Trump laiha kualifikasaun ba kargu, tanba falta kompeténsia
no instabilidade iha nia karater.
"Sr.
Trump laiha personalidade, valór sira ka esperiénsia hodi sai nu'udar
Prezidente", sira hakerek no subliña katak ne'e sei halo fraku autoridade
moral Estadus Unidus nian iha mundu.
Sira
hatete mós katak kandidatu parese la liga aspetu elementár sira hosi
Konstituisaun no hosi Direitu norte-amerikanu sira nian.
Donald
Trump la'ós de'it "ignorante" iha domíniu ba relasaun internasional
sira, maibé mós "la hatudu dezeju ruma hodi buka hatene", sira
afirma.
Haktuir
krítika sira hosi Hillary Clinton, personalidade sira ne'e subliña katak
bilionáriu la hatudu disiplina, autokontrolu no "la konsege tolera krítika
pesoal sira".
"Hamosu
reseiru hosi ami nia aliadu sira tanba nia hahalok erátiku", sira hakerek
no hatutan katak "karakterístika sira ne'e hanesan perigozu iha ema ida
ne'ebé hakarak sai nu'udar Prezidente (...), ho responsabilidade hosi arsenal
nuklear EUA nian".
Trump
reaje ona iha komunikadu, hodi hatete katak laiha "buat ida di'ak lou duké
elite hosi Washington ne'ebé falla ona noa tenta mantér sira nia kbiit".
Aleinde
ne'e, akuza ona signatáriu sira hosi karta ne'e katak hanesan "autór hosi
desizaun dezastrozu sira hodi invade Irake, hodi permiti norte-amerikanu sira
mate iha Bengazi no sai hanesan ema sira ne'ebé permiti ona aumentu hosi [grupu
terorista] Estadu Islámiku".
"Ha'u
hato'o vizaun di'ak ida ba ita nia nasaun no ba polítika estranjeiru, vizaun
ida ne'ebé la'ós vizaun hosi família ida governante nian iha polítika",
nia afirma ona.
Entre
signatáriu sira hosi karta ne'e iha Michael Hayden, antigu diretór hosi CIA,
John Negroponte, antigu diretór hosi ajénsia seguransa nasional no númeru
daruak hosi Departamentu Estadu nian, durante mandatu hosi George W. Bush, Eric
Edelman, antigu konselleiru seguransa nasional hosi vise-prezidente Dick
Cheney, no Robert Zoellick, antigu diplomata no prezidente hosi Banku Mundial.
SAPO
TL ho Lusa - Foto: Shawn Thew / EPA
Sem comentários:
Enviar um comentário