YMCA Dudu Sees Sporting Clubo de Timor

DILI, (ANTIL) – Klubu Sporting Clubo de Timor (SCT) tenki eliminadu hosi Kopa 12 basá lakon ho YMCA 2-0 iha Estádiu Municipál Dili, Sábadu (06/08) lokraik.

Golu rua ne’e kontribui hosi Zacarias Cabral iha minutu 55 no Zelagio Inâcio Magno iha minutu 91.

Primeira parte kuandu hahú, YMCA domina kedas bola. Iha minutu 9, jogadór númeru 7 (médiu avansadu) koko lolo baliza liu-hosi xutu bareira maibé falla tanba hetan salva hosi baliza.

Xutu ne’ebé hanesan ezekuta hosi jogadór 26 (defeza) maibé lá hahoris rezultadu. Rezultadu kontinua 0-0.

Entretantu, Sporting de Timor ne’ebé antes ne’e ladun hetan bola, sira mós hahú ofensivu. Iha minutu 18, jogadór avansadu Mariano Miguel (20) hetan oportunidade úniku iha grandeia adversáriu nian maibé falla. Baliza YMCA konsege salva bola ne’ebé ho velosidade maka’as.

La’os ne’e de’it. Iha minutu extra nian, jogadór Mariano hetan tan oportunidade iha momentu ne’ebé baliza abandona rede maibé sorte laek. To’o primeira parte ramata, ekipa rua seidauk konsege rezultadu golu.

Iha segunda parte, YMCA kontinua mantein sira nia ritmu jogu. Presaun ba guarda rede adversáriu nab-naban de’it. Iha minutu 45, jogadór médiu Ezequiel (7) husik tan xutu bareira ida ba Sporting nia guarda rede maibé xuta ne’e konsege salva hosi guarda rede.

Minutu 59, Zelagio (22) ezekuta ninia xuta ne´ebé fora hosi grandeia maibé ne’e mós kontinua laiha rezultadu.

Espíritu hosi jogadór YMCA seidauk monu. Sira kontinua luta atu manán jogu ida ne’e. Sorte mai dadauk. Iha minutu 85, Zacarias (42), kedok bola tama to’o iha grandeia adversáriu no konsege ezekuta ho di’ak. Ho Zacarias nia golu, muda skor hosi 0-0 sai 1-0. Golu ida ne’e akontese tanba defeza Sporting, Barnade (15) falla impede bola hosi Zacarias nia ain.

Dala ida tan, iha minutu 91, Zelagio kedok mes-mesak bola ba grandeia Sporting no hatama golu sein iha impedementu hosi defeza. Defeza Sporting hanoin katak jogadór Zelagio iha pozisaun offside. Golu refere lori YMCA lidera jogu ne’e ho skor 2-0.

Ekipa Sporting mós hetan oportunidade balun iha segunda parte maibé sorte lá afavór ba sira. Iha minutu 51, Mariano (20) hakat liu defeza no garantidu atu hatama golu maibé sukit sala tiha bola, tan ne’e labele realiza golu.

Luta atu bele impata ou manán laiha serteja. Iha minutu 65 no minutu ida ne’e nu’udar minutu osan mean ba Sporting maibé jogadór númeru 20 ne´e la produtivu nafatin. Nia hetan bola di’ak hosi ninia belun extremu maibé falla ezekuta iha grandeia laran.

Segunda parte ramata, Sporting hela ho zero. Enkuantu, YMCA avansa ho vitória 2-0.

Iha konferénsia ba imprensa, Treinadór YMCA, Ercio Guterres informa katak sira manán tanba treinu di’ak no jogadór sira iha espíritu ás.

Maibé, nia dehan, sira presiza hadi’a jogadór sira nia fíziku no mentál. Ida ne’e maka sai hanesan sira nia frakeza.

Iha parte seluk, Asistente Treinadór Sporting Clubo de Timor, Romão Guterres rekuñese katak sira nia frakeza ne’e iha avansadu. Tuir nia katak sira nia defeza no médiu ne’e di’ak ona. Tan ne’e, Romão dehan sira buka hadi’a maka avansadu.

Nia hatutan sira hetan oportunidade barak maibé lá konsege ezekuta ho di’ak tanba avansadu fraku. (jornalista: Xisto Freitas; editora : Rita Almeida)