KOMANDO F-FDTL-PNTL LA TOLERA MEMBRU KRIMINOJU

Komandante Jeral Polisia Nasionál Timor Leste (PNTL), Komisáriu Julio da Costa Hornay hatete,  Komando Falintil Forsa Defeza Timor Leste (F-FDTL) no Komando PNTL sei la tolera membru F-FDTL no PNTL ne’ebé komete krimi.

“Komando laiha toleransia ba membru sira ne’ebé mak hakarak baku malu, ita halo prosesu depois ita foti medidas,”deklara Julio Hornay ba jornalista sira Sesta (05/08) iha Palacio Prezidensia Aitarak Laran Dili, hafoin hasoru malu ho Prezidenti Repúblika (PR), Taur Matan Ruak.

Nia esplika, membru Polisia sira ne’ebé mak halo krime ne’e, Komando sei fó suspensaun preventiva, hodi ses husi servisu atu atende prosesu.

Hatan konaba Komando F-FDTL deside lori membru PNTL ne’ebé baku membru F-FDTL foin lalais ne’e tanba, membru PNTL baku bei-beik membru F-FDTL, Komisariu Julio Hornay dehan,  Komando PNTL mós hasai tiha ona prosesu ba oknum PNTL ne’e.

“Komando rua  ne’e (F-FDTL no PNTL) foti desizaun ona, ami hasai tiha ona despaixu konjunta atu halo investigasaun konjunta ba pesoal PNTL ne’ebé baku F-FDTL,” katak nia.

Haktuir nia, la’os membru PNTL de’it, membru F-FDTL ne’ebé baku membru PNTL iha Ainaro mós, Komando rua ne’e asina tiha ona despaisu atu halo investigasaun.

“Ida ne’e mak Komando rua ninia asaun ba ninia membru sira ne’ebé malandru hakarak baku malu, mas prosesu atu hasoru membru malandru sira ne’e rua, ida mak kuandu baku ne’e tama ona iha krime, tenki hatan iha tribunal, indisiplinar hatan iha Komando,”haklaken nia. cos

Jornal Nacional