AFF Champiuonship U-19: Lafaek lolo Malasya 3-2

Selesaun Timor-Leste manan jogu importante kontra selesaun Malasya ho rezultadu 3-2, ohin loron 17 Setembru 2016, iha kampu Vietnam Youth Football Training Center.

SALVIO ONLINE – Liu husi rezultadu ida nee, Lafaek iha oportunidade boot hodi hakatak ba semi-final, naran katak labele lakon iha jogu ikus kontra Singapura. Enkuntu Malasya sei koko forsa ho selesaun uma nain Vietnam iha jogu ikus.

Desde kompetisaun nee hahu halao iha 2005, foin mak ba dahuluk selesaun lafaek manan Malasya iha kompetisaun ofisial.

Selesaun Timor-Leste loke markador iha minutu 32 liu husi jogador Frangcyatma Ime Keli. Liu deit minutu haat, iha minutu 36, dala ida tan ‘Frans’ aumenta vantajen ba 2-0. Malasya konsegue hamenus diferensa ba 2-1 iha minitu ikus husi primeira parte liu husi jogador Muhammad Jafri Chew.

Tama ba segunda parte, la kleur deit Malasya halo impata jogu liu husi jogador Muhammad Danial Ashraf Abdullah, iha minutu 58. Linha defeza husi Malasya nebe ladun iha koordenasaun diak halo lafaek konsegue marka golu ba dala tolu liu husi jogador Gelvanio Alberto nebe aproveita ho diak bola cruza husi Joao Pedro Freitas, iha minutu 71.

Rezultado 3-2 la muda too jogu remata, nudar vitoria selesaun Timor-Leste dahuluk kontra Malasya, desde 2005.

Ho rezultadu ida nee, selesaun Timor-Leste, mantein nafatin iha pozisaun 3, ho pontu 6, iha tabela klasifikasaun. Enkuantu Malasya nebe iha pontu hanesan ho selesaun Timor-Leste, maibe tamba diferensa golu diak liu, tur iha pozisaun 2.

Singapura nebe iha jogu seluk manan Filipina ho skor 2-1, tur iha pozisauin 4 ho pontu 4. Filipina remata ona sira nia jogu iha kompetisaun nee, tur iha pozisaun ikus liu ho pontu 0, rezultadu husi lakon dala 4 husi jogu 4.

Iha jogu ikus, selesaun Timor-Leste sei hasoru Singapura, iha loron 19 Setembru, tuku 6 lokraik OTL, no Malasya sei hasoru uma nain Vietnam.

Timor iha posibilidade boot passa ba faze semi-final se karik la lakon iha jogu ikus kontra Singapura.

PARCERIA COM SALVIO ONLINE