domingo, 18 de setembro de 2016

Governu Estabelese Ofisina Nasional

PARTILHAR

Atu poupa gastus manutensaun ba kareta estadu, governu liu husi Ministeriu Finansas estabelese ona ofisina nasional.

Diretor Nasional Gestaun Patrimonio Estadu (DNGPE) Ministeiru Finansas (MF), Martinho Lopes, hateten desde estabelese ofisina ne’e iha tinan 2014-2015, konsege ona poupa 40% kustu despezas ba manutensaun  ba kareta estadu.

“Iha ne’e ekipamentus kompletu inklui ho nia material, bainhira kareta aat ami hadia kedas,” Diretor Lopes hateten.

Maibe antes halo manutensaun ba kareta ne’ebe a’at, nia dehan tekniku sira halo uluk inspesaun hodi haree kondisaun kareta aat duni ou lae?, atu prevene manobra.

Alende ne’e, nia dehan bainhira sasan balun laiha ga stok hotu iha ofisina nasional ne’e, ekipa tekniku sira halo rekomendasaun ba ofisina seluk (privadu).

Hafoin ofisina ne’e estabelese iha tinan 2014, nia dehan foin ministeriu 10 no sekretariadu balun deit mak submete kareta estadu (aat) halo manutensaun iha ofisina ne’e.

“Ofisina ne’e hanesan pilotu ida, maibe kuandu ami haree ba mak bele poupa osan barak liu, entaun ami sei alarga tan ba ministeiru sira seluk,” nia hateten.

Enkuantu kareta estadu ne’ebe halo manutensaun iha ofisina ne’e desde estabelese, nia hateten hamutuk 2000, kareta estadu husi ministeiru edukasaun mak barak liu.

No total teknikus ne’ebe servisu iha ofisina ne’e, nia dehan hamutuk nain 18.

Nune’e mos nia hateten, iha tinan ida ne’e orsamentu jeral estadu ne’ebe aloka ba diresaun Gestaun Patromoniu Estadu hamutuk $1.8 miloens. 

Iha parte seluk Membru Parlamentu Josefa Alvares Soares, konsidera ne’e inisiativa ne’ebe diak atu hamenus kustu ba manutensaun kareta estadu sira.

“Ne’e inisitiva ne’ebe diak, tanba kada tinan kareta estadu sempre aumenta entaun orsamentu ba manutensaun mos aumenta, e ho maneira ida ne’e bele halo poupansa ba gastus,” nia hateten.

Nia mos husu ba dirasaun ne’e atu halo jestaun ne’ebe rigorozu hodi garantia subtentabilidade ofisina ne’e iha future.

The Dili Weekly
PARTILHAR

Author: verified_user

Publicação luso-timorense sem fins lucrativos

0 comentários: