Mate ona Mascarenhas Monteiro ne'ebé hanesan antigu prezidente Cabo Verde nian

Antigu Prezidente Repúblika Cabo Verde nian António Mascarenhas Monteiro, xefe Estadu dahuluk kabu-verdianu nian ne'ebé eleitu tuir dalan demokrátiku, mate ona iha loron 16 Setembru 2016 ho tinan 72, vítima hosi moras kleur, fó sai iha notísia hosi imprensa lokal iha loron-sesta ne'e.

Tuir imprensa, antigu prezidente mate iha nia uma, iha sidade Praia, durante loron-sesta dadeer.

Moris iha Santa Catarina de Santiago, jurista no majistradu, António Mascarenhas Monteiro sai ona nu'udar prezidente Repúblika dahuluk hosi Cabo Verde ne'ebé maka eleitu hosi votu diretu no universal, iha fulan-Fevereiru 1991, ho apoiu hosi Movimentu ba Demokrasia (MpD).

Liutiha tinan lima, iha 1996, eleitu fila fali lahó adversáriu ruma, ho nafatin apoiu hosi MpD.

Formadu iha Direitu hosi Universidade Katólika Lovaina, Béljika, António Mascarenhas Monteiro sai nu'udar prezidente hosi Supremu Tribunal Justisa Cabo Verde nian iha dékada 80.

Antes sai ona nu'udar sekretáriu-jeral hosi Asembleia Nasiona Popular iha tinan dahuluk sira independénsia Cabo Verde nian.

Iha Portugal, hetan ona homenajen ho Grande Colar hosi Orden Liberdade nian iha tinan 1991 no ho Grande Colar hosi Orden Infante D. Henrique iha tinan 2000.

Iha fulan-Setembru 2006, nia hatán ba nomeasaun nu'udar reprezentante espesial ba Timor-Leste ne'ebé maka dezigna hosi sekretáriu-jeral ONU iha tempu ne'ebá, Kofi Annan.

SAPO TL ho Lusa