Labarik 27 Detein Iha Prizaun Becora

Labarik ho idade 16-21 hamutuk nain 27 mak agora dadaun detein hela iha prizaun Becora, tanba komete krimi omisidiu no violasaun seksual.

Diretor Nasional Servisu Prisional no Reinsersaun Sosial, Helder Cosme Marcal Belo, hateten labaraik hirak ne’e tama iha prizaun tanba konflito ho lei, balun involve iha kazu omisidiu no balun iha aktu violasaun seksaul.

“Ami tau sira iha blok ketak, sira la hamutuk ho ema bo’ot sira,” Diretor Belo hateten.

Nia dehan, labarik sira ne’e presiza hetan tratamentu ne’ebe efetive hanesan edukasaun vokasional inklui konseling, atu muda sira nia mentalidade nune’e wainhira sai husi prizaun, labele repete tan aktu hanesan.

Husi nain 27 ne’e, nia hateten nain 20 hetan ona sentensa; preventive nain 6 no medida seguransa iha nain ida (1).

Iha parte seluk Membru Parlamentu Anna Ribeiro, hakfodak tanba labarik ho idade hanesan ne’e bele konflito ho lei hodi tama iha prizaun.

Nia dehan, situasaun ne’e hatudu katak valor edukasaun tantu iha uma laran no eskola seidauk maximu.

“Oho ema ho idade hanesan ne’e, inan aman no mestre/a sira iha eskola presiza servisu maka’as liu tan,” nia sujere.

Nia konsidera situasaun ne’e seriu, no estadu tenke toma responsabilidade halo prevensaun ba labarik sira, hodi la bele komete krimi.

The Dili Weekly