La’ós Buat Foun Kuandu Investigadór Hetan Ameasa

DILI, (ANTIL) – Komisariu Komisaun Anti Korupsaun (KAK), Aderito Pinto Tilman hatete, la’ós buat foun kuandu investigadór sira hasoru dezafiu, obstaklu, intervensaun no ameasa iha prosesu investigasaun.

”Ameasa ne’e natureza hanesan ema investigadór, ita tenke la’o nafatin ba oin, servisu iha ekipa nune’e bele atinji objetivu”, komisariu ne’e iha ninia mensajen serimonia tomada de posse ba investigadór nain 12 ne’ebé simu posse iha edifísiu KAK Faról, Sesta, (16/9).

Tuir nia, tomada de posse ne’e hanesan simboliku ida hosi formasaun no estajiu durante tinan ida.

Tomade de posse ne’e simbolika, la-signifika remata ona prosesu aprende maibé kontinua hasa’e nafatin integridade no profesionalismu.

Juramentu ne’ebé halo tenke obedese ba lei, Repúblika Demokratika Timor-Leste, konstituisaun, no garante integridade profesionalismu, salva no guarda segredu ne’ebé estadu ezije.

Nia husu atu kumpri juramentu ne’ebé halo hanesan dever no espesialista ba anti korupsaun. ”Ba oin komesa assume ona responsabilidade todan hanesan espesialista anti korupsaun, liliu sira ne’ebé iha área investigasaun ninian”, nia realsa.

Hameno mos atu labele lori asuntu partikulár, interese grupu ou partidu iha servisu laran maibé, ka’er mak lei anti korupsaun nu’udar mata-dalan hodi hala’o kna’ar ho didiak.

Sira neébe simu posse mak Auxiliadora Soares, Dinis dos Santos Brites Silva, Domingos Lopes, Horácio Lopes, Mario de Jesus Amaral, Noémia Fátima de Sousa Guterres, Paulo Anuno, Paulo Fernando Viana, Simplício de Sousa Gama, Ferdinal Alves, Belito Marcal Ray, Filomeno Filha da Gama. (jornalista: Rita Almeida)

Foto: Komisariu ho adjuntu Komisariu Komisaun Anti Korupsaun hasai foto hamutuk ho investigadór sira ne'ebé simu tomada de posse iha edifisiu KAK Faról, Sesta, (16/9). Foto ANTIL/Rita Almeida