KOMUNIDADE TENKI HAMOS AMBIENTE

Ministeriu saude husu komunidade atu hamos ambiente hodi prevene virus ZIKA, ne’ebe agora aumenta makas iha nasaun viziñu hanesan Indoensia no Singapura.

“Ami husu ita hotu nia partisipasaun atu kombate virus ZIKA iha ita nia nasaun, mai ita hotu hamos uma ninin liu husi atividade hanesan labele soe for arbiru, fase no taka metin balde ka bidon ne’ebe rai bee mos ba, hakoi kalen no botil aat, hamamuk bee iha roda no vazu aifunan,”hato’o xefi departementu promosaun no edukasaun saude MS, Misliza Vital ba jornalista sira iha MS, Kuarta (28/9/19).

Nia esplika, moras zika ho moras dengue laiha deferensia, tanba moras rua ne’e nia transmisaun husi susuk Aedes Aegypti no susuk ne’e tata ema iha loron deit, tanba ne’e ema hotu tenki evita no hadok aan husi susuk liu husi hamos ambiente.

Misliza subliña, vasinasaun ba virus zika laiha, maibe halo prevensaun liu husi hatais roupa, uza aimoruk susuk, rega aimoruk sususk iha uma laran, toba iha muskiteiru laran, taka janela ho redi no hamos susuk knuk.

Tantu Ministeriu Saude to’o agora seidauk indentifika ema hira mak kona moras husi virus ZIKA, mesmu lao makas ona iha nasaun viziñu.

Tuir estatistika husi organizasaun saude mundial (OMS) hatudu katak, iha nasaun Singapura ema nain 333 mak sofre ona moras husi virus ZIKA.

MS hari’i komisaun ba moras sortu

Alende ne’e, Ministeriu Saude hari’i grupu komisaun ba moras sortu atu halo prevensaun ba moras zika iha Timor Leste.

“Ami hari’i mos komisaun ba moras surtu, komisaun sortu ne’e laos foin mak hahu agora, maibe eziste tiha ona iha tinan kotuk liu ba. Komisaun sortu ne’e kompostu husi diretur jeral mai to’o xefi departamentu hotu hodi halo prevensaun ba virus Zika,”informa  xefi departementu promosaun no edukasaun saude MS, Misliza Vital ba jornalista sira iha MS, Kuarta (28/9/19).

Nia hatutan, atividade ne’ebe importante ba ministeriu saude halo mak, sensibiliza informasaun ba komunidade konaba virus ZIKA, nune’e sira bele iha koñesementu.

Nia hatutan, MS koordena ho munisipiu Dili ne’ebe hetan suporta husi Organizasaun Mundial da Saude (OMS) halo prevensaun iha Airoportu, hodi halo cekup ba pasajeirus ne’ebe tama mai.

“Ami iha ona unidade saude iha airoportu, iha fatin entrada iha ona pesoal saude ho materia virus ZIKA nian, no ami koko halo atividade survelensia ativu ne’e,“esplika nia. Car

Jornal Nacional