MUTL EJIJI PN HALAKON REGALIAS TOMAK

Movimentu Universitariu Timor Lorosae (MUTL) kontinua  ejiji ba Parlamentu Nasional (PN) atu halakon regalias tomak Lei Pensaun Vitalisia (LPV).

“Nudar ita hotu hatene katak, MUTL durante ne’e sempre insiste ba orgaun Estadu, liu-liu Parlamentu Nasional (PN) atu halo revizaun ne’ebe mak fundamental ba lei numeru 1/2007, pensaun mensal vitalisia deputadu sira nian no nia regalias sira seluk nune’e mos lei numeru 7/2007 estatutu titulares orgaun soberanu nian, tanba MUTL konsidera lei refere sei kria sosiedade ne’ebe mak dezikilibru sei halo mohu osan povu  nian husi mina no gas, sei prejudika sustentabilidade ekonomia TL  nian ne’ebe sei halo  barukten sosiedade ne’ebe ho idade produtivu inklui sei habokur grupu kikoan balun  nune’e sei hamosu klase burgesia iha TL,”afirma portavoz MUTL, Faustino Soares  liu husi konferensia imprensa iha kampus sentral  Universidade Nasional Timor Lorosae (UNTL) Kinta (29/9/2016).

Portavoz MUTL haktuir, esforsu ne’ebe durante ne’e sira foti ba publiku la’os ona ajende MUTL nian deit, maibe entidades hotu inklui Prezidente da Republika (PR), Taur  Matan Ruak eis orgaun titulares, no eis membru PN balun konkorda ona atu halo mudansa ne’ebe signifikante hodi responde ba ejijensia publiku, maibe na realidade husi prosesu  halo revizaun ba lei refere maske tama ona ba faze aprovasaun generalidade iha PN hatudu katak, la halo mudansa signifikante hodi responde ba publiku ninia ejijensia.

“Bazeia ba  projetu   lei ne’ebe ma hetan ona aprovasaun generalidade katak, nafatin propoin ba eis prezidente da republika 100% ba eis PM, ba Prezidente PN no eis prezidente tribunal rekursu tun deit ba 60% inklui iha nafatin direitu regalia sira seluk ne’ebe mak halo grupu kikoan ida ne’e sai previleziadu iha TL,”MUTL preokupa.

Mudansa  iha projetu LPV ne’e MUTL konsidera la justu nafatin ba povu, tanba lakonsidera MUTL no sosiedade sivil inklui publiku tomak nia petisaun ne’ebe  durante ne’e hato’o ba PN.

“Nune’e MUTL  hakarak ejiji ba PN liu-liu komisaun espesializada ne’ebe mak halo pareser ba lei refere atu  konsidera publiku nia ejijensia durante ne’e hodi bele hetan mudansa ne’ebe signifikante no fundamental. Nune’e  nafatin fo hanoin ba deputadu sira katak, sei iha posibilidade  hodi halakon total ba lei refere tanba  bainhira la halakon mak  futuru oin mai sei lori problema ou malisan at ba Estadu TL nia futuru,”esklarese nia.

Alen de ne’e MUTL husu ba membru PN, husu mos ba Partidu Politiku sira atu ho seriedade diskute asuntu ne’e ho nia bankada sira  iha PN, nune’e revijaun ba lei refere iha signifikante ba povu nia ejijensia.ola

Jornal Nacional

Lee liu iha Timor Agora

MUTL: “Mudansa fundamental ba lei pensaun vitaliasia agora” - KONFERÉNSIA IMPRENSA