VETERANUS DEKLARA APOIA LU-OLO BA PR, XANANA NIA APOIU LA SIGNIFIKA MANAN ONA

Reprezentante veteranu sira husi Munisípiu hat (4), deklara abertamente ba públiku katak, sira fó apoiu tomak ba kandidatu Prezidenti Repúblika (PR), Francisco Guterres ‘Lu-Olo’ atu sai povu Timor-Leste nian PR ba periodu 2017 to’o 2022.

Veteranu Agusto de Araújo ‘Tara’, hatete katak, sira reprezenta veteranu hotu iha Timor-Leste atu  hato’o informasaun balun ba públiku kona ba veteranu sira-nia pozisaun.

“Ami fó ami nia apoiu tomak ba maun bo’ot Lu-Olo, atu bele karik iha 2017 to’o 2022, bele tu’ur iha fatin ne’ebé hodi hadia mós rai ne’e, atu fó kontribuisaun ba nasaun nia estabilidade, nasaun no povu Timor Leste ninia moris di’ak,”dehan Tara liu husi konfrensia ba imprensa ne’ebé hala’o iha Comite Central da FRETILIN, Comoro-Dili, Tersa (31/01).

Tara hatutan, hanesan veteranu, iha vizaun polítika no estratejia polítika ida-idak nian. Maibé hanesan ho esperitu maubere nia oan, sira senti katak, ida ne’e oportunidade ida últimu ba Lu-Olo fó nia kontribuisaun ba nasaun ida ne’e.

Tara haktuir, veteranu sira iha hanoin ida de’it, hodi fó apoiu ba kandidatu Prezidenti Repúblika Lu-Olo, tanba Lu-Olo mós terus hamutuk ho veteranu sira seluk durante tinan 24 iha ailaran hodi liberta rai doben Timor Leste ne’e.

“Ami veteranus ne’ebé mai iha ne’e, husi Munisípiu hat (4) hanesan, Ainaro, Aileu, Liquiça no Ermera. Mas ba ha’u nia-an bele kompromete iha fatin ne’e katak, Suai, Maliana, Same Munisípiu hirak ne’e, tanba ha’u nia ema iha Munisípiu hirak ne’e iha hotu,” dehan Tara.

Nia afirma, veteranus hakarak ka lakohi tenki fó apoiu tomak ba Lu-Olo atu sai Prezidenti Repúblika Timor Leste nian iha periodu 2017 to’o 2022.

“Hanesan 2012, maun Taur avansa ba iha segunda ronde, maibé iha momentu ne’eba karik ami la hamrik, dalaruma nia mós la liu. Mas agora ami sei la apoia ona seluk, maibé ami tenki fó apoiu ba maun Lu-Olo,” relata Tara.

Nune’e mós, kandidatu Prezidenti  Repúblika, Francisco Guterres ‘Lu-Olo’  dehan, nia agradese ba veteranu sira ne’ebé deklara atu fó apoiu ba nia kandidatura.

“Deklarasaun apoiu ida ne’e, ha’u bele dehan katak, mai husi sentimentu ida ne’ebé ita kuda liu tiha ona hamutuk iha tinan 24 nia laran iha ailaran. Sentimentu ida ne’e, harii metin ho ita rasik ninia kosar ben, ho ita-nia maluk sira seluk nia ran ho isin hodi harii no buras to’o ohin loron,” katak Lu-Olo.

Prezidenti  Partidu FRETILIN ne’e esklarese, ho sentimentu ida ne’e mak dudu veteranu sira deklara sira nia-an atu apoiu nia kandidatura ba Prezidenti Repúblika ba tinan 2017 to’o 2022.

“Ita ida agora, ha’u hanoin importante teb-tebes para ita hotu hanoin hamutuk no hanesan. Imi hotu foin deklara ne’e para ita hotu lori ita-nia rain ida ne’e, lori ita nia maun no ita-nia aman sira nia sakrifisiu bo’ot iha foho leten, no ita balu ne’ebé sei moris to’o ohin loron, atu bele husik no kuda buras iha ita-nia rain, atu povu ida ne’e bele moris ho hakmatek, moris ho domin, no moris ho dezenvolvimentu, no moris ho vida ida ne’ebé mak di’ak,”relata Lu-Olo.

Eis Prezidenti Parlamentu Nasionál ne’e afirma, valor luta veteranu sira nian mak povu tenki moris iha vida dezenvolvimentu no moris ho domin, kuandu ida ne’e mak lahetan, entaun valor luta ne’e laiha.

“Luta atu hadia moris, tanba ita sei mukit hela. Ida ne’e ita hotu nia hakarak ne’ebé mak ita hotu tenki lori, no hakarak ida ne’e kuda ho sentimentu ida ne’ebé liu husi ita-nia sakrifisiu, no ita-nia terus,” katak Lu-Olo.

Nia afirma, dalabarak liu veteranu sira fila kotuk ba malu, entaun hamosu mós des-intendimentu oi-oin, no lia fuan la tuir malu.

Lu-Olo dehan, tinan sanulu resin lima (15), naton ona ba veteranu sira atu hamutuk fila fali sai ida de’it, hodi halo buat ruma ba nasaun ne’e.

Xanana nia apoiu la signifika manan ona

Nune’e mos, kandidatu ba Prezidenti Repúblika, atual Prezidenti Partidu FRETILIN, Francisco Guterres ‘Lu-Olo’ hatete katak, ho deklarasaun lider karismátiku Kay Rala Xanana Gusmão nian hodi fó apoiu ba nia kandidatura ne’e, la signifika katak, Lu-Olo manan ona eleisaun Prezidensial.

Nia hatutan, deklarasaun Xanana Gusmão nian hodi fó apoiu ba ninia kandidatura ne’e, mai husi nia fuan rasik, no sentimentu ida ne’ebé sira kuda hamutuk iha funu laran hodi liberta povu no rai ida ne’e.

“Kompromisu mak ida ne’e, ami hamutuk fila fali para dezenvolve ita-nia rain, laiha kompromisu seluk tan. Ha’u dehan ona katak, ne’e maun bo’ot ninia desizaun pesoal, ha’u fiar nafatin iha povu nia votus, no partidu sira seluk sira-nia militantes ne’ebé fó sira-nia apoiu mós mai ha’u. La’os dehan katak, maun bo’ot apoiu ona ne’e, ha’u manan los tiha ona, ne’e la’e. Ha’u mós fiar katak, maun bo’ot sei submete ba povu nia votu,” deklara Lu-Olo ba jornalista sira iha CCF Comoro Dili, Tersa (31/01).

Lu-Olo dehan, nia ho Xanana laiha akordu ida kona ba apoiu ne’e, inklui mós deklarasaun ne’ebé veteranu sira halo hodi apoia nia.

“Horibainhira ha’u anunsia ha’u nia kandidatura ba Prezidenti Repúblika, ita-nia maun bo’ot Xanana Gusmão mós hatete katak, ha’u apoia ha’u nia alin Lu-Olo ninia kandidatura ba Prezidenti Repúblika,” informa Lu-Olo.

Nia esklarese, sukat liafuan Xanana Gusmão nian, nia kompriende katak, Xanana nia liafuan ne’e hatete katak, tempu to’o ona atu lideransa rezistensia sira fó liman ba malu no tempu to’o ona atu hamutuk fila fali.

“Ha’u nia lia fuan seida’uk ba to’o ba nia, kuandu to’o loron ida, ha’u sei iha lia fuan ida atu bele dedika ba nia,” afirma Lu-Olo.

Prezidenti Partidu istoriku FRETILIN ne’e dehan, Xanana nia liafuan ne’e, husu dala ida tan ba Lu-Olo hodi fó nia kontribuisaun ba rai no povu ida ne’e.

“Apoiu maun Xanana nian ne’e, mai husi ninia fuan rasik, la’os mai husi ninia partidu, apoiu ne’e mai husi nia pesoal no nia fuan laran,”tenik Lu-Olo.cos

Jornal Nacional Diário