quarta-feira, 1 de fevereiro de 2017

BNU iha Timor-Leste simu sertifikadu hosi investidor externu ho vantajen fiskal sira

PARTILHAR
Iha loron-kuarta ne'e governu timoroan entrega ona Sertifikadu hosi Investidor Externu ba BNU, ajénsia hosi CGD iha Díli, ne'ebé tinan ne'e hahú planu investimentu ida ho dolar millaun 4,7 (euro millaun 4,36), foka liuliu iha teknolojia.

Sertifikadu ne'e entrega ona ba diretor jeral BNU nian iha Timor-Leste, Fernando Torrão Alves, hosi ministru Estadu, Kordenador hosi Asuntu Ekonómiku sira, Estanislau da Silva, iha serimónia ida iha ajénsia promosaun ba investimentu timoroan nian, TradeInvest.

Hanesan sertifikadu ida ne'ebé lori atribuisaun ba benefísiu fiskal sira no aduaneiru sira durante tinan lima, no iha sujeitu ba kandidatura ida hosi BNU liuhosi planu investimentu ida nian ba tinan hirak tuirmai ne'e.

"Hanesan prova ida konfiansa maka'as nian: hosi Caixa Geral de Depósitos hodi kontinua nia operasuan iha Timor ho marka BNU, no hosi autoridade timoroan sira tanba rekoñese saida maka ami halo no esforsu hosi sé maka fiar ona iha nasaun maski iha momentu aat sira", Torrão Alves hatete ba Lusa.

Estanislau da Silva felisita no agradese ona ba CGD apoiu ne'ebé fó ba Timor-Leste no tanba fiar no apoia nasaun iha períudu ajitadu iha inísiu pós-independénsia nian.

"Bainhira moras maka hatene belun sira. Timor agradese ona faktu ne'e. Ohin loron iha banku barak maibé iha adversidade laiha ema seluk ida, iha maka CGD ho marka BNU", nia hatete.


Torrão Alves esplika ona katak planu investimentu ne'ebé sei aplika iha fulan 30 oinmai sentra liuliu iha teknolojia.

Aleinde kartaun kréditu sira - sira ne'ebé hanesan dahuluk iha Timor-Leste no sei hahú komersializadu iha fulan rua nia laran - planu inklui sertifikasaun dijital ba levantamentu sira ne'ebé halo iha balkaun (impresaun dijital) to'o fulan-Juñu, no aplikasaun foun ida hosi banka online ba telefone móvel sira to'o tinan ne'e nia rohan.

Kalkula mós notifikasaun automátiku sira ho SMS iha tranzasaun eletróniku nasional no internasional sira, hadi'a aplikasaun sira hodi hamenus risku ba brankeamentu kapital sira nian, aumentu ba zona automátiku iha edifísiu sede nian, ho multibanku ualu, jestaun eletróniku ba fila sira nian (to'o tinan ne'e nia rihan) no infraestrutura foun sira seguransa nina (iha tinan oinmai), no seluk tan.

Ho universu ida ho kliente rihun 70 resin, BNU agora daudaun iha kaixa multibanku hamutuk 40 iha Timor-Leste, ho prezensa iha munisípiu 12 hosi munisípiu 13 (ida ikus sei hakotu iha tinan ne'e), iha funsionáriu timoroan hamutuk na'in 126 no funsionáriu internasional na'in hitu (entre sira maka diresaun jeral).

BNU hanesan banku dahuluk ne'ebé instala iha Timor-Leste no banku antigu liu ne'ebé halo operasaun iha teritóriu, halo parte hosi Grupu Caixa Geral de Depósitos, loke ajénsia dahuluk iha Díli iha tinan 1912, iha kapital timoroan, iha Díli, liutiha tinan tolu halo sirkulasaun ba nota provativu dahuluk sira ba Timor-Leste.

Prezensa hosi banku ne'e la kontinua durante okupasaun indonéziu iha Timor-Leste, no Ajénsia CGD/BNU Timor-Leste hahú loke fali ba públiku iha loron 10 Jullu 2001.

BNU rejista ona iha tinan 2016 rezultadu líkidu ida ho dolar millaun 5,55 (euro millaun 5,1), no karteira depózitu ida ho folin dolar millaun 344 ka euro millaun 318,8 (iha tinan 2015 nia rohan maka dolar millaun 217 ka euro millaun 201) no kréditu sira ho dolar millaun 69,3 ka euro millaun 64,2 (iha tinan 2015 nia rohan maka dolar millaun 79,6 ka euro millaun 73,76).

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: