PRIMEIRA DAMA ISABEL: “HA’U LA ASEITA XANANA MINIMIZA SISTEMA JUDISIAL TL”

Primeira Dama Isabel Fereira, sente triste tebes no la aseita intervensaun lider karismátiku Xanana Gusmão ne’ebé halo karta aberta ida hodi minimiza sistema judisiál Timor-Leste no hatete servisu tribunais la hatene lian Português.

“Ha’u la aseita intervensaun husi Maun Xanana, hodi minimiza sistema judisial iha Timor-Leste. Ida ne’e ita senti triste hanesan sidadaun ida no ativista direitus humanus, ha’u la konkorda tanba aktu ne’e ladi’ak. Sé karik maun Xanana senti la konkorda ho desizaun  ne’ebé Tribunal Distrital Dili (TDD), hatun ba arguida Emilia Pires tinan hitu (7) prizaun hatudu provas hodi defende arguida Emilia Pires, la’os  halo karta aberta hodi minimiza ita nia sistema tribunal liu-liu Juiz, Prokurador no Defensor sira. Tanba ida ne’e ladi’ak,” hatete Primeira Dama iha Palásiu Governu, Segunda (30/01), hodi responde ba pergunta jornalista sira nia kestiona konaba karta aberta ne’ebé eis Primeiru Ministru Kay Rala Xanana Gusmão hakerek, no fó sai iha média sosiál balu, halo krítika maka’as hasoru sistema judisiál Timor-Leste no hatete juiz sira la hatene lian Português.

Isabel esplika katak, TL nasaun independenti no demokrátiku, tanba ne’e ema hotu hanesan iha lei okos.

“Ita ohin hanesan nasaun independenti, sa tan nasaun ida ho naran Repúblika Demokrátika de Timor-Leste (RDTL), ita hotu iha lei nia okos, ita hotu tenki hakruk ba lei, lei la haree nia Prezidenti da Repúblika, la haree nia veteranus, la haree nia funu na’in, lei trata ema hotu hanesan. Tanba ne’e ha’u la dun kontenti hanesan ativista direitus humanus ne’ebé hala’o formasaun diretu iha tempu Indonesia la aseita ho deklarasaun ida ne’e,” dehan Isabel.

Isabel hatutan katak, sé dehan sira ne’ebé formasaun iha Indonesia la hatene buat ida, ne’e maun bo’ot hatudu liman sala, tanba durante tinan 15 maun serbisu ho sira, tanba sa mak, ho deit Emilia Pires nia kazu ne’e, maun dehan ema la hatene lian Português liu-liu juiz sira.

“Kuandu kazu barak akontese maun la dehan ema la hatene lian Português, liu-liu iha krizi 2006, tribunál  akuza ema sira hanesan Taur Matan Ruak, Lere Anan Timur, Falur Rate Laek ho sira seluk tan, maun la hatete dehan Tribunal ladi’ak, maun la defende sira hanesan ohin maun defende Emilia Pires, tribunal akuza dotor Mari Alkatiri, maun la defende katak sira luta barak ba rai ne’e, nusa maka Emilia tau fali espesiál. Ida ne’e pontu interogasaun ida ba ita hotu, tanba ne’e ha’u hanesan ativista direitus humanus iha tempu Indonesia senti triste ho deklarasaun ida ne’e, i husu ba maun hanesan lider ne’ebé lidera funu ida ne’e tenki hatene katak ohin loron ita ukun-an ona, la’os sei iha rezistensia ne’ebé buat hotu-hotu tenki halo tuir maun nia hakarak,” Isabel haklaken.

Antes ne’e, iha karta aberta ne’ebé maun bo’ot Xanana hakerek no fo sai iha media katak, halo krítika maka’as ba sistema judisiál nasaun nian, iha karta aberta ba eis Ministra Finanças ida ne’ebé kondena iha Díli, hodi defende katak nia la sala no akuza ajente judisiál ho korupsaun.

No eis Primeiru Ministru ne’e mós admira juiz sira la hatene lian Português no julga konaba lei ne’ebé hakerek ho português no asina akordaun ne’e rasik la komprende.des

Jornal Nacional Diário