quarta-feira, 1 de fevereiro de 2017

LU-OLO: KARTA XANANA NIAN HUSU JUIZ TENKI INDEPENDENTI

Prezidenti Partidu FRETILIN, Francisco Guterres ‘Lu-Olo’ hatete katak, karta Ministru Planeamentu no Investimentu Estratéjiku, Kay Rala Xanana Gusmão, nian ba órgaun Justisa sira, la’os atu halo intervensaun ba judisial, liu-liu kazu eis Ministra Finansas, arguida Emilia Pires, maibé karta ne’e Xanana husu juiz sira atu hala’o servisu ho independenti no imparsialidade.

“Ha’u hanoin, ezijensia Kay Rala Xanana Gusmão ninian ne’e mak, tribunal tenki  independente  no imparsialidade. Katak,  juiz sira tenki haree kazu sira ne’e ho ninia imparsialidade tenki bo’ot tebes,”katak Lu-Olo ba jornalista sira iha Comite Central da FRETILIN (CCF), Comoro-Dili, Tersa (31/01), hafoin akompaña veteranu sira halo deklarasaun apoia ninia kandidatura ba Prezidenti Repúblika periodu 2017 to’o 2022.

Hatan kona ba Primeira Dama, Isabel Ferreira, mos lansa krítika hasoru Xanana Gusmão, katak, Xanana hanesan figura importante ida iha nasaun ne’e, nia lamerese atu halo intervensaun ba justisa iha Timor Leste, liu-liu kazu Emilia Pires nian, Lu-Olo hatan katak, ne’e Primeira Dama mak hatene.

“Primeira Dama ninia reasaun ba karta Ministru Planeamentu no Investimentu Estratejiku, Xanana Gusmão nian ne’e, Sra. Primeira Dama mak hatene,”dehan Lu-Olo.

Maibé Lu-Olo dehan, tenki buka atu intende saida mak Kay Rala Xanana Gusmão hakarak atu hatete iha karta ninian ba orgaun judisial ne’e.

“Ba ha’u mak ne’e, independensia tribunal sira nian, ita tenki respeita. Husi fali sorin ita tenki hatete katak, imparsialidade juiz sira nian iha kazu konkretus ne’ebé sira julga tenki iha maka’as,”relata Lu-Olo.

Nia haktuir, imparsialidade juiz sira nian iha kazu konkretu ne’ebé submete ba tribunal, juiz sira tu’ur iha leten atu bele deside. Maibé Lu-Olo dehan, nia lakohi lori kazu ida ne’e atu halo polítika ba nia-an, tanba nia mós hakarak fó ninia hanoin ba situasaun ne’e.

Antes ne’e, iha karta aberta ne’ebé maun bo’ot Xanana Gusmão, hakerek no fo sai iha media katak, halo krítika maka’as ba sistema judisiál Timor-Leste nian, ne’ebé iha karta aberta ba eis Ministra Finansas, Emilia Pires ida ne’ebé kondena iha Díli, hodi defende katak nia la sala no akuza ajente judisiál ho korupsaun.

Eis Primeiru Ministru Xanana Gusmão mós admira juiz sira la hatene lian Português no julga kona-ba lei ne’ebé hakerek ho Português no asina akordaun ne’e rasik la kompriende. cos 

Jornal Nacional Diário

1 comentário:

Jose Alves Costa disse...

Lider maksimu mak la fo fiar ba author justica ona, oinsa justica atu lao diak?