domingo, 26 de março de 2017

Governu La Hatene Paradeiru 23 Veteranus Reformadu

PARTILHAR
Komandante Geral Falintil-Forsa Defeza Timor –Leste (F-FDTL), Xefe Estadu Major Jeneral Lere Anan Timor husu ba governu atu tau matan ba veteranus nain 23 ne’ebe reforma iha tinan 2015, tanba sira nia moris mizeradu tebes.

Nia hateten, sira nain 23 ne’e instituisaun fo reforma tanba bazea ba lei estatutu militar nian, entaun Estadu iha dever atu tau matan ba sira.

“Desde reforma to’o ohin loron ita lahatene sira nia paradeiru,” nia dehan.

Nia rekonese, katak wainhira sira hetan reforma, estadu konsege fo duni subsidio, maibe ne’e la to’o tanba fo dala ida deit.

“Sira ne’e moris kiak no mate mos ho kiak, sira presiza atensaun,” nia dehan.

Hatan ba kestaun ne’e Ministru Defeza, Cirilo Cristovao, hateten governu fo ona subsidio reintegrasaun hamutuk $15 mil ba sira nain 23 ne’e iha momentu sira hetan reforma.

“Ami mos halo uma ba sira, iha Baucau, Viqueque, Lospalos no Ainaro e fatin ne’e sira mak deside,” nia hateten.

Nia hateten, asaun hirak ne’e hatudu katak governu sempre tau matan ba veteranus ne’ebe mak sakrifika sira nia vida tomak ba independensia ida ne’e.

Alende ne’e, nia mos rekonese katak governu seidauk tau matan ba sira ho maximu, tanba ne’e sira kria ona programa balun hodi responde ba situasaun ne’e.

Iha parte seluk Mmebru Parlamentu (MP) Albina Marcal, hateten sira merese atu hetan moris ne’ebe diak iha independensia ida ne’e, tanba uluk sira terus ba rai ida ne’e.

“Sira fo duni sira nia vida tomak ba nasaun ne’e durante 24 anos, estadu presiza trata sira ho dignu,” nia dehan.

PARTILHAR

Author: verified_user

Publicação luso-timorense sem fins lucrativos

0 comentários: