ME LOUVA KAPASIDADE PROFESSORES

Premeira Vise Ministra Edukasaun (ME) Asuntu Pre-Eskolar Ensino Baziku, Dulce de Jesus Soares, louva kapasidade professores, tanba durante ne’e konsege lori estudante barak sai susesu iha nivel hotu-hotu.

“Mesmu ema barak kestioan  kona ba professores sira nia kapasidade, maibe ba ha’u pesoal louva professores sira, tanba ho kapasidade minimu ne’ebé mak sira iha, ho limitasaun ho sakrifisiu sira ne’ebé hala’o konsege lori duni gerasaun ida ne’e, no oras ne’e dadaun balun iha ona ensinu superior no balun akaba tiha sira nia estudu iha rai liur, no barak mak serve nasaun ida ne’e,”esklarese primeira VME, Dulce de Jesus, ba JN-Diario hafoin partisipa iha konferensia nasional Edukasaun iha Salaun Delta Nova Dilifoin lalais ne’e.

Tanba ne’e nia dehan,  ema hotu tenke agradese ba esforsu professores sira hotu ninia kontribuisaun ne’ebé durante ne’e ofrese ona ba nasaun.

“Ita labele hatun sira, ita tenki hadomi sira, tanba iha professores balun sofre mate iha sala laran, mesmu nia kapasidade laiha, maibe nia lori nia kosar been hodi hanorin,”haktuir Dulce de Jesus.

VME ne’e hatutan,  ME hanesan ministeriu ida ne’ebé mak tutela ba edukasaun, iha obrigasaun no responsalbidade tomak hodi kontinua reforsa professores sira nia kapasidade  iha lian portugues liu husi dalan oin-oin.

“Ita iha formasaun kontinua, iha programa ida formal ne’ebé mak ita lori professores lingua portuguesa Portugal, nune’e mos husi nasaun ho nasaun CPLP, atu koloka sira ba iha eskola ida-idak,”dehan nia.

Tuir nia katak, agora dadaun iha profesores portugues hamutuk 21, koloka ba iha eskola sira atu nune’e, servisu dereitamente ho professores lokal para bele ajuda hanorin lian portuguesa ho lolos.

Iha oportunidade ne’e VME apela ba professores kontrtatdu sira atu kontinua servisu ho diak, tanba ME halo ona esforsu ho Ministeriu Financas (MF) rezolve problema salariu. eni

Jornal Nacional Diário