segunda-feira, 27 de março de 2017

Governu Harii Tan Stadium Lima

Governu sei harii tan stadium lima iha munisipio Dili atu fo espasu ba jogador sira treinu no dezenvolve sira nia kapasidade.

Sekretario Estado Joventude e Desportu (SEJD), Leovigildo da Costa Hornai konsidera nesesariu duni atu harii stadium ba jogador sira tanba klubu barak mak eziste ona no sira presiza fatin atu treinu.

Nia dehan estadium sira ne’e sei harii iha Becora, Bidau Santana, Lecidere, Kampung Alor no Comoro.

 “La’os atu harii kampu bo’ot maibe importante tenke iha, tanba ita iha ona klubu sira, fo oportunidade ba sira atu treinu,” nia hateten, iha Dili.

Alende ne’e, nia dehan iha mos sentru futebol juvenile ne’ebe presiza espasu atu treinu hodi prepara jogador Timor oan iha futuru. 

Nia informa, SEJD sei servisu hamutuk ho prezidente autoridade munisipio sira hodi hala’o prosesu kontrusaun no jestaun ba iha propriedade ida ne’e no agora loke ona tender ba aprezentasuan dezenho.

Nia dehan, ba dezenho kada estadium sei gasta $200 mil no $1 milaun ba iha konstrusaun to’o remata. 

Entretantu, Membru Parlamentu (MP) Osorio Florindo hateten SEJD rasik hetan orsamentu ratifikativu ho $1.9 miloens hodi dezenvolve infra-estruturas desportu nian liu –liu kampu. 

Tanba ne’e, nia konkorda kuandu governu harii tan stadium, fo espasu ba foinsa’e sira atu hala’o atividades desportu nian iha bairo laran ho ida ne’e bele hado’ok sira husi violensia. 

“Kampu ne’e ami sujere uza dei du’ut sintetik, tanba nia manutensaun baratu no jogador sira bele uza lor-loron,” nia sujere.

“See uza du’ut seluk, presiza tau pupuk bei-beik no ida ne’e bele estraga rai no halo rai sai to’os.”

Nudar orgaun fiskalizador, nia rekonese katak kampu sai problema ba foinsa’e sira, liu –liu hamate sira nia vontade atu kapasita aan iha area desportu, tanba realidade joven barak iha interese maibe laiha espasu ba sira atu treinu.

The Dili Weekly

Sem comentários: