segunda-feira, 27 de março de 2017

PROFISIONALISMU PNTL IMPORTANTE

PARTILHAR
Polisia Nasionál Timor Leste (PNTL) ohin, Segunda (27/03), halo aniversáriu ba dala 17. Ho aniversáriu ne’e, Parlamentu Nasionál (PN) husu ba instituisaun PNTL atu servisu profissional liu tan hodi garante seguransa ba povu Timor Leste.

Prezidenti Parlamentu Nasionál, Aderito Hugo da Costa hatete, durante ne’e PNTL hatudu ona sira nian profisionalismu ba akontesimentu kiik oan sira iha povu nia leet.

“Tinan ida ne’e, halo idade instituisaun ida ne’e sufisiente ona atu instituisaun ida ne’e mais profissional hanesan espetativa ema hotu nian, no espetativa Estadu nian, atu instituisaun hanesan PNTL bele dezempeña sira-nia servisu profissional liu tan atu servi ita nia povu, no mantein lei no orden,”dehan Aderito Hugo ba jornalista sira iha PN, Sesta (24/03).

Nia haktuir, reforma ne’ebé mak akontese iha 2008 iha setór defeza no seguransa, introdus medidas adekuadu ba disiplinas institusaun defeza no seguransa nian.

“Ita hein katak, PNTL ho idade tinan ida ne’e tan, mais madoru iha sira-nia servisu atu mantein orden públiku,” katak Aderito Hugo.

Nia hatutan, susesu ne’ebé mak PNTL  hatudu durante ne’e, ezemplu ida mak iha eleisaun Prezidensial ne’ebé mak  foin realiza iha loron hira liu ba.

Aderito afirma, iha eleisaun Prezidensial ne’e, PNTL hatudu sira-nia dezempeñu ne’ebé mak di’ak tebes, no akontesementu ki’ik oan sira ne’ebé mak akontese iha komunidade nia leet, PNTL  halo atuasaun ho konsistente tebes.

“Ita hakarak sira kontinua iha nivel ida ne’e (atuasaun), atu bele eleva liu tan sira-nia profesionalismu, tanba ida ne’e mak ita hakarak,” salienta Aderito Hugo.

Maibé Prezidenti Parlamentu Nasionál ne’e ne’e esklarese, númeru PNTL nian presija atu aumenta, tanba kada tinan númeru populasaun mós aumenta, ho volume prezensa polisia nian iha nivel Suku mós importante tebes.

“Haree husi situasaun atual, ho polisia komunitária ita hotu apresia, maibé no agora iha nivel Suku, polisia komunitária ne’e, ida de’it. Karik ita presija, sei bele aumenta númeru ne’e, mas tenki fazeadamente, tanba presija haree ho polisia nia ejistensia to’o iha tinan ida ne’e,” tenik Aderito.

Eis Vise Prezidenti Parlamentu Nasionál ne’e mos dehan, fasilidades PNTL nian ne’e, presija haree didi’ak atu hatene hodi resolve.

“Ida ne’e kestaun orsamentu ka kestaun manejementu,  tanba ba ita, orsamentu ba Ministériu Defeza no Seguransa ne’e, la’os obstaklu. Obstaklu ne’e mak iha implementasaun no planu,” afirma Aderito Hugo.

Tenki melhora liu tan servisu

Nune’e mos, Bispu Diocese Dili, Dom Virgilio do Carmo da Silva, SDB, husu ba Polisia Nasional Timor Leste (PNTL), atu melhora liu tan servisu iha terrenu.

“Ha’u fo parabens ba instititu  tomak ba servisu hotu  ne’ebé mak hala’o ba nasaun  no povu ida ne’e, tanba  ne’e ha’u esperansa katak, sempre la’o ba oin  ho mehi atu melhora nafatin, buat barak  ne’ebé liu tiha ona, optimism nafatin ba futuru,”esplika  Dom Virgilio do Carmo da Silva, ba jornalista sira, iha Kapela Santo António, Akademia Polisia Domingu (26/03/2017) hafoin prezide missa  ba aniversario PNTL ba dala 17 ohin, Segunda (27/03/2017).

Dom  Virgilio hatutan, ho aniversariu ne’e nudar mos tempu ida hodi halo reflesaun ba buat ne’ebe mak hakat tiha ona iha pasadu hodi hadia iha futuru.

“Ha’u hanoin selebrasaun aniversario iha ne’ebé deit sempre iha haksolok, maibe  iha oportunidade para  halo reflesaun,”hateten Dom Virgilio.

Iha parte seluk, Ministru Interior, Longuinhos Monteiro, hato’o agredesimentu ba Bispu  Dom Virgilio, tanba bele hala’o misa ba PNTL hodi selebra aniversario PNTL ba dala 17.

“Ha’u husu imi basa liman dala ida tanba ba Bispu, no koro husi Oecussi, tanba bele dook, maibe bele mai kanta iha misa aniversario PNTL nian,”hateten Longuinhos Monteiro.

Hafoin misa remata, Ministru Interior  Longuinhos Monteiro, Komandante Jeral PNTL, Komisario Julio Hornai, ho ninia membrus sira lori aifunan ba kari iha monomentu PNTL Caicoli Dili, hodi fo hanoin hikas membrus Polisia sira ne’ebé mak mate iha tempu krizi 2006.

Tuir observasaun JN-Diário nota katak, misa ne’ebé mak hala’o iha Kapela Santo António, Akademia Polisia ne’e, hetan partisipasaun maximu membrus PNTL sira. Alende ne’e misa ne’e hetan partisipasaun husi komunidade sira husi ema bo’ot no labarik sira.

PM Rui kongratula PNTL

Nunee mos Primeiru Ministru (PM), Rui Maria de Araújo, elojia no kongratula Polisia Nasional Timor-Leste (PNTL), tanba hala’o serbisu ne’ebé di’ak tebes durante nee.

“Durante kampaña eletorais no iha eleisaun prezidensial loron 20 Marsu semana kotuk, polisia halo seguransa di’ak tebes, sira konsege mantein ordem públiku ne’ebé di’ak. Ne’ebé ha’u hato’o parabens ba sira, PNTL hotu-hotu, husi ofisiais superioris, ofisiais mai to’o ajente sira hotu, sira nia loron PNTL nian, halo votus ba selebrasaun ne’ebé di’ak, maibé hodi Governu nia hakarak hato’o mós parabens importante ba sira ne’ebé maka selebra ona aniverisáriu ba dala 17 (27 Marsu 2000-27 Marsu 2017),” hateten PM Rui Maria de Araújo ba jornalista sira hafoin partisipa komemorasaun loron mundial bee iha Suku Tibar, Postu Administrativu Bazartete, Munisípiu Liquiça Sesta (24/03).

Xefi Governu ne’e dehan tan, PNTL sei iha difikuldades barak, maibé ho Ministru foun, Komandu PNTL foun, buka atu rezolve kestaun balun, liu-liu iha área promosoens, oinsa atu koloka ema ne’ebé lós iha fatin ne’ebé lós no oras ne’e prosesu ne’e mós la’o hela.

“Purtantu neneik-neneik ita hala’o esforsu tomak iha âmbitu profisionalizasaun PNTL ninian,” Xefi Governu ne’e haklaken. cos/avi/des

Jornal Nacional Diário
PARTILHAR

Author: verified_user

Publicação luso-timorense sem fins lucrativos

0 comentários: