Mezmu Iha CC-TV, Seguransa Tenke Mantein Pozisaun Iha Terenu

DILI – Agora dadaun Kapital Dili, iha ona CC-TV monta hodi kontrola sidadaun sira, maibe seguransa tenke mantein pozisaun iha terenu, liu-liu iha fatin perigozu.

Lia fuan hirak nee hatoo husi Prezidente Komisaun B David Dias hatete,  ikus-ikus nee sempre rona baku malu sona malu,  halo mate  no hakanek, ida nee presiza governu tau atensaun hodi haree ba kestaun  hirak nee. I polisia sira tenke lao nafatin atu nunee haree ba povu sira nia moris ho seguransa neebe mak diak.

Hau koalia tanba agora nee joven sira barak mak mate ona, neebe polisia sira laos para tau CC-TV hodi haree deit, ida nee ladun diak, tanba CC-TV nee buat ida hodi fasilita neebe polisia sira mos tenke iha fo seguransa iha terenu,” katak Deputadu David ba Jornalista Kinta nee, iha Parlamentu Nasional.

Nia hatete, Polisia komunitariu sira, tuir los tenke iha sira nia fatin, atu nunee sira bele seguransa povu sira ho diak, liu-liu fatin sira neebe mak sai perigozu.

Nunee mos Deputadu husi Bancada PD Paulino Monteiro hatete, husu ba joven sira tenke fo preokupasaun ba sira nia futuru, i governu mos tenke aumenta kampu servisu atu nunee hodi hases joven sira husi hahalok buka poblema no provoka malu, atu nunee labele ba tuur iha estrada kalan-kalan hodi provoka malu ikus sai problema.

Iha parte seluk, joventude Audian Perdro Julman hatete, koalia kona ba atu prevene problema neebe mak sempre akontese iha rai laran, liu-liu iha munisipiu Dili, depnde ba ema ida-idak nia konsensia,   moral, bainhira konsensia lao ho moral diak, buat hotu sei laakontese. Guilhermina Franco

Suara Timor Lorosae