Xanana Husu Setór Privadu Book-an Hodi Investe

TIBAR (TATOLI) - Ministru Planeamentu no Investimentu Estratéjiku (MPIE), Kay Rala Xanana Gusmão husu ba setór privadu Timor-Leste atu book-an halo investimentu la’ós hadau halo projektu tanba Tibar ba futuru tenke sai zona indústriál ida atubele hakbesik-an ba Portu Baia.

“Ha’u husu ba setór privadu atu book-an, hanoin didi’ak ba atu investe. Investe lahalo de’it otél, ita halo tiha otél di’ak ida iha fatin hotu atu bolu turizmu mai, turista sira dook, mai hemu bee aqua husi Indonézia, jus husi Indonézia, mai han supermi. Ita tenke komesa prodús”, Xanana apela iha lansamentu fatuk dahuluk ba Portu Baia Tibar, ohin.

Timor-Leste tenke esporta, maibé importasaun mak beibeik hanesan bee mós importa, tanba ne’e ba oin Timór tenke hanoin atu prodús.

Relasiona ho kondisaun dependenti ba esprtasaun, Xanana husu ba setór privadu la’ós de’it bá hadau atu halo projetu hotu ona, maibé komesa ona atu hanoin atu investe.

Aleinde ne’e, apela mós ba Sekretáriu Estadu Terras no Propriedade atu ba oin la bele ona fó lisensa atu ema hela iha Tibar, Tuir Xanana, durante Terras no Propriedade lakon kontrolu hodi fó lisensa ba ema halo uma barak iha Tibar.

“Ita sei muda ita-nia rai ne’e, ita sei hadi’a ita-nia rai ne’e mas hotu-hotu tenke partisipa ho di’ak, partisipa ho fiar katak ita hotu ida-idak halo ninian, ita sei bá oin,” Xanana fó hanoin.

Tibar, tuir Xanana pertense ba portu atu halo pequenas média indústria atu hatún importasaun no aumenta esportasaun hodi osan labá liur mas ba iha povu produtór nia bolsu hodi reduz ki’ak iha Timor-Leste.

Tuir Programa V Governu konstitusionál nian, 2012-2017 ne’ebé mak VI governu kontinua haktuir katak, Governu sei konstrói Portu Nasionál multifunsoens, iha Tibar, ho kapasidade atu simu, kada tinan, toneladas tokon 1, ho ona kondisoens atu simui Ró-ahi komersiais no pasajeiros nian.

Projektu Portu Tibar, sei involve mós konstrusaun estrada ho padraun Internasionál, entre Dili ho Tibar, maibé projektu ne’e sei kostrói ho forma fazeada, tuir ezijênsias portuárias ne’eb’e sei aumenta, no tuir alokasaun orsamentais.

Jornalista: Maria Auxiliadora | Editór: Manuel Pinto

Foto: Ministru Planeamentu no Investimentu Estratéjiku (MPIE), Kay Rala Xanana Gusmão iha lansamentu fatuk dahuluk Portu Baia Tibar. Foto/Mídia MPIE.