quinta-feira, 15 de junho de 2017

PR: "Istória sira korajen nian" hosi luta timoroan ba independénsia tenki rejistadu

PARTILHAR
Prezidente Repúblika timoroan defende ona iha loron-kuarta ne'e katak "istória sira korajen nian" hosi luta timoroan nian ba independénsia nasaun nian tenki rejistadu, inkluzivu hodi inspira jerasaun sira iha futuru.

"Ha'u fiar katak iha istória barak korajen nian dezde tempu hosi ita nia bizavó sira to'o ohin loron. Ita tenki rejista istória sira ne'e iha surat-tahan hodi nune'e jerasaun futuru sira bele hatene kontributu saida maka fó ona ba istória ne'ebé identifika ita nu'udar povu", afirma hosi Francisco Guterres Lu-Olo iha Liquiçá, iha oeste Díli nian.

Xefe Estadu defende mós investimentu boot ida iha prezervasaun hosi patrimóniu hosi "valor istóriku notável" hanesan kadeia Aipelo no "heransa valiozu sira seluk hosi tempu kolonial portugés" ne'ebé maka permanese iha munisípiu Liquiçá.

"Konstrusaun antigu balun nakonu ho istória rekupera tiha ona, balun hahú tama iha prosesu destruisaun nian", nia hatete no fó ezemplu ba rezidénsia administrador nian, ne'ebé harii antes tinan 1910 no agora "tama iha estadu degradasaun nian".

Lu-Olo ko'alia iha serimónia ida hakohi restu mortal sira hosi ema na'in 259 ne'ebé mai hosi munisípiu ne'ebé rekolla iha pontu oioin Timor-Leste nian no agora hetan homenajen.


Serimónia, ne'ebé akontese iha Jardim dos Heróis iha Liquiçá, hakarak halo homenajen ba "ema sira ne'ebé fó ona sira nia moris ba luta libertasaun nasional nian", haktuir hosi Prezidénsia Repúblika nian.

Restu mortal sira hosi mártir sira ne'e rekolla iha fatin oioin iha nasaun laran ho apoiu hosi família sira, hosi Komisaun Rekolla hosi Restu Mortal sira hosi munisípiu Liquiçá nian no hosi Ministériu Solidariedade Sosial nian.

"Serimónia hakohi ne'e halo parte hosi esforsu sira Estadu nian hodi fó dignidade ba luta hosi asu-wa'in sira ba libertasaun nasional. Faktu katak restu mortal sira hosi mártir na'in 359 rekolla iha fatin oioin nasaun nian hatudu kontributu hosi komunidade Liquiçá nian ba objetivu komun libertasaun nasional nian hasoru okupasaun indonéziu", hatete iha nota ida hosi Prezidénsia.

Halo diskursu hodi reprezenta órgaun soberania tomak maibé mós nu'udar "veteranu no kombatente", Lu-Olo konsidera ona importante hanoin istória hosi luta ema timoroan sira nian ba nia libertasaun hosi okupasaun indonéziu.

Nia hatete katak homenajen loron ohin nian hanesan oportunidade hodi hanoin períudu ida istória nian ne'ebé reprezenta "mehi no vontade koletivu" hosi ema timoroan sira, harii "la'ós hosi ema ida ka rua" maibé hosi ema tomak.

"Istória ida ne'ebé harii ho korajen, determinasaun no sakrifísiu sira. Durante tinan 25, ema millaun resin lakon ona nia moris. Kaer no sakrifika ema rihun resin. Ema millaun resin fó ona sira nia moris, iha nasaun no iha estranjeiru, hodi halo ita nia mehi sai realidade ida: independénsia", nia hatete.

"Tanba nia asaun militar ka polítika sira merese ita nia homenajen, tanba liuhosi nia sakrifísiu maka ita restaura ita nia independénsia iha loron 20 Maiu 2002. Ho sakrifísiu ne'e maka permiti ona mai ita hodi harii ita nia nasaun", xefe Estadu hatete.

"Liuhosi sakrifísiu ne'e maka ohin loron ita iha ne'e nu'udar povu ida de'it ho nia istória rasik, nia kultura, nia konsiénsia no vontade rasik", nia hatutan.

Prezidente Repúblika hanoin hikas "Liquiçá nia oan sira" ne'ebé mate ona tanba independénsia, entre sira maka Prezidente daruak, Nicolau Lobato "ne'ebé, hahú hosi tempu portugés, hanoin ona oinsá maka liberta povu dominadu".

"Ita hili fatin ida ne'ebé ohin loron sai hanesan parte hosi ita nia memória koletivu, ne'ebé ita dignifika hanesan traballador sira nasaun Timor-Leste nian. Fatin ne'e ohin loron sai hanesan referénsia boot istóriku nian ba jerasaun futuru sira no ba sira ne'ebé ohin loron vizita ida no sei vizita ida, ne'ebé mai hosi nasaun oioin", nia hatete.

Serimónia iha prezensa hosi líder nasional oioin, inklui primeiru-ministru Rui Maria de Araújo, prezidente Parlamentu Nasional nian, Adérito Hugo da Costa no prezidente Tribunal Rekursu nian Deolindo dos Santos.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: