Lori Estudante Laiha Eleitoral Tuir Kampaña

DILI - Partidu boot balu lori estudante sira neebe laiha kartaun eleitoral, hodi ba tuir sira nia kampaña. “Atu nunee bele halo kontenti sira nia lider parpol,” hateten Prezidente PLP Taur Matan Ruak.

Nia dehan tan, “Imi harre sira lori labarik estudante sira neebe laiha kartaun eleitoral halo kampaña. Sira ba borok deit labarik sira hodi haklalak ba sira”. Maibe katak Taur, “Ita hakarak iha dignidade. Kuandu iha tinan 5 nia laran, lori osan pensaun vitalisia, sira fo $25. Sira hanoin lori osan nee sosa ita nia fuan. Indonesia la sosa ita nia fuan no dignidade. Sa tan kulit metan hanesan ho ita, sira sei la sosa ita”. Deklarasaun Taur nee hatoo iha ninia kampaña iha Tasi Tolu, Domingo (16/7/2017).

Taur hateten tan, iha loron rua tolu, partidu balu sei mai halo kampaina fatin nee (Tasi Tolu). Lori osan no faru. Simu deit hodi halo kontenti sira depois iha loron votasaun, vota ba PLP. Taur senti kontenti no agradese ba joven no inan man sira tanba halo Tasi Tolu rame.

Imi labaruk atu rona tanba Numeru 12 nee importante los. Imi mai iha nee tanba hakarak atu iha mudansa, atu fahe riku hanesan no oportunidade hanesan. Lakohi iha diskriminasaun. Ita lakoi atu grupu kiik oan riku matak iha ita nia leet. Funu hotu, sira mos faan modo hanesan ita”.

Taur dehan tan. “Ema sira nee hanesan kaer masin soe tiha ba bee laran. Hanesan rakut paun iha oan sira nia liman, fo tiha ba animal sira. Ita lakoi ida nee. Iha hau nia mandatu nudar Prezidenti da Republika, hau promulga orsamentu rihun 8 resin, sira halo fali uma andar sanulu resin iha Aitarak Laran. Hateke tun sintina, sira nia uma kakuluk laiha”. Sira duni ema rai nain neebe buka moris iha dalan ninin. Duni tama too uma laran maibe sira  fatin ba ema riku. Ema sira mai, supa Timor nia rikusoin. Natalino Costa

Suara Timor Lorosae