Prezidente TR Levanta Kestaun Tolu Ba Xefe Estadu

DILI, (TATOLI) - Prezidente Tribunál Rekursu (TR), Deolindo dos Santos, Tersa ne’e iha Palásiu Prezidente Nicolau Lobato, Bairru Pité, Dili, levanta kestaun tolu (3) ba Xefe Estadu Francisco Guterres Lú Olo relasiona ho TR nia serbisu.

Deolindo esplika, kestaun dahuluk, atu serbisu Tribunál ne’e di’ak liu-tan, presiza haree jestaun ka administrasaun para bele apoiu ba serbisu prosesuál no bainhira serbisu prosesuál ne’e sai di’ak presiza iha jestaun ne’ebé di’ak iha Tribunál.

Aleinde ne’e, nia dehan, ko’alia mós kona-ba halo nusa maka juiz sira halo serbisu ne’e ho lais no atu fasilita ida ne’e presiza iha órgaun ne’ebé maka kontrola juiz sira, liu-liu Konsellu Superior Majistratura Judisiál tenke funsiona ho di’ak para bele haree katak serbisu juiz sira nian ne’e di’ak ka ladi’ak, iha kondisaun ona para halo promosaun ba juiz sira ka seidauk.

Deolindo hatutan, sira mós ko’alia kona-ba eventu internasionál ne’ebé maka sei realiza iha tinan oin iha Timor maka Asembleia Jerál ba Tribunál Kontas hosi Nasaun sira ko’alia lian Portugés (CPLP) ne’ebé sei realiza entre juñu no jullu.

Jornalista: Xisto Freitas | Editór: Manuel Pinto

Imajen: Prezidenti da Repúblika Francisco Guterres Lu-olo (liman-loos) kaer liman ho Prezidente Tribunál Rekursu, Deolindo dos Santos. Foto Mídia PR.