Sekretario Estadu Joventude no
Trabalho (SEJT), Nivio Magalhães, hatete Sekretaria Estadu Joventude no
Trabalho sei haruka fila Timor oan 474 ne’ebe dadaun ne’e servisu ilegal iha
Korea.
Governante nee hatutan katak
embaixada Korea hatete sira sei hamenus kouta no hapara kursu lian Korea
wainhira la kumpre no la resolve trabalhador ilegal sira nee.
“Ha’u hanoin ida ne’e risko tebes
ba programa kursos lian Korea sei ita husik nafatin trabalhador ilegal
474 iha Korea”, dehan Sekretario Estadu Joventude no Trabalho, Nivio
Magalhães ba Jornalista sira iha Timor-Plaza Dili, Kinta (08/02/2018).
Nivio Magalhães dehan atu evita
problema nee, diak liu haruka fila sira ne’ebe ilegal hodi nunee loke dalan ba
trabalhador rihun hat too rihun lima (4 – 5 mill) ba servisu iha Korea
“Laos ita husik hela 474 para
prejudika fali 4 mil ida ne’e lojika mak ne’e, entaun hau hanoin ita
presiza resolve problema ilegal ne’e, maske iha trabalhador Korea balun ne’ebe
ladun kontente maibe atu hatete deit ba interese Povu no Nasaun iha balun hirus
ne’e normal maibe importante mak tenke tane a’as povu no Nasaun”, afirma
Sekretario Estadu Joventude no Trabalho.
Nia sublinha SEJT sei estuda no
sei servisu ho autoridade sira iha Korea atu resolve problema no klaru katak
trabalhador sira ne’e viola ona kontrato ne’ebe iha tanba sira ne’ebe ilegal
sira abandona servisu ou troka fali sira nia fatin servisu.
Sekretario Estadu nee mos fo
ezeplu katak trabalhador sira nee atu ba servisu iha Peskas maibe sira ba fali
servisu iha Fabrika, alende iha balun ne’ebe kontratu hotu ona maibe sira
lakohi fila mai Timor.
“Ha’u hakarak apela ba sira hotu
katak hanesan Timor oan labele taka dalan ba malu no ba ema seluk maibe tenke
hanoin malu tanba Nasaun ida ne’e ita hotu nian no ita tenke kontribui ba
dezenvolvimento nasional”, dehan Nivio.
Total trabalhador ne’ebe mak sei
servisu iha Korea 2000 liu maibe husi parte SEJT sei lobi hodi aumenta tan
kouta ne’ebe iha, laos ba deit Korea maibe ba mos Australia.Fel
Sem comentários:
Enviar um comentário