sexta-feira, 4 de maio de 2018

Lere Louva Horta

PARTILHAR

DILI, (TATOLI) - Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur louva eis Prezidente Repúblika, José Ramos Horta, tanba durante kampaña eleisaun antesipada Horta nunka fó sai linguajen ne’ebé insulta ema seluk.

“Ramos Horta nu’udar ema diplomata ne’ebé nunka hakarak tolok ema no ninia linguajen nunka soke ka insulta ema. Ita polítiku ne’e maka dalaruma ita nia linguajen ema la gosta,” Lere hato’o argumentu ne’e ba jornalista sira iha Palásiu Prezidente Nicolau Lobato, Bairru Pité, Dili, semana ne’e, hafoin soru-mutu ho Prezidente Repúblika, Francisco Guterres Lú Olo.

Tuir nia katak, Horta, ema ne’ebé hatene jere ninia linguajen no líder seluk hanesan Marí Alkatiri nu’udar ema polítiku ne’ebé ko’alia ba loos mai loos no Xanana Gusmão nu’udar líder ida polítiku no estratega mós.

“Estratega, polítiku no diplomasia hamutuk ne’e maka ita manán independénsia iha tinan 1999 liu-ba. Estratega de’it labele manán funu, nune’e mós polítiku no diplomasia,” nia esplika.

Kona-ba líder balun (Lere la temi naran) ne’ebé hato’o linguajen insultu durante kampaña, Lere hatán, nia labele hanorin ninia mestre, maibé mestre mós tenke aprende buat di’ak ruma hosi ninia alunu sira,” eis líder rezisténsia afirma.

Jornalista: Xisto Freitas | Editór: Manuel Pinto

Imajen: Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur.
PARTILHAR

Author: verified_user

Publicação luso-timorense sem fins lucrativos

0 comentários: