DILI, (TATOLI) – Xefe Estadu
FALINTIL-Forsa Defeza Timor-Leste (F-FDTL), Majór Jenerál Lere Anan Timur, la
satisfáz ho desizaun Parlamentu Nasionál (PN) nian hodi sumba
Prezidente-Repúblika nia viajen Estadu ba Portugal.
“Polítiku na’in sira ne’ebé túr
iha Parlamentu Nasionál argumenta katak sira la autoriza Prezidente-Repúblika
hala’o vizita Estadu ba Portugal iha 10 jullu tanba impase polítika. Maibé,
loloos, labele impede Prezidente-Repúblika nia viajen tanba viajen ida ne’e
la’ós ba interese pesoál maibé interese Estadu Timor-Leste”, Lere hato’o ba
jornalista sira iha Palásiu Prezidente Nicolau Lobato, Bairru Pité, kuarta
ne’e, relasiona ho PN halo kanselamentu ba Xefe Estadu nia viajen iha segunda
loraik (9/7) liuhusi votasaun iha plenária.
Tuir nia Prezidente-Repúblika nia
viajen ne’e la halo Estadu vakum, tanba orgaun soberania sira seluk hanesan
Governu no Parlamentu iha atu tau matan ba Estadu no nasaun ne’e.
Diplomátikamente, tuir Jenerál
Fitun Rua ne’e afeta ba relasaun bilaterál entre nasaun rua (Timor-Leste no
Portugal), maibé nia hein katak Portugal bele kompriende situasaun ida ne’e (la
lori ba lia) tanba Portugal ho Timor-Leste amigu dezde uluk kedas.
“Kanselamentu ne’e ba dala rua
ona. Tinan kotuk, Prezidente rasik kansela ninia viajen Estadu ba Nova Iorke
tanba impase polítika no agora PN kansela tan ona”, Lere haktuir.
Enkuantu, tersa horisehik iha
Palásiu Prezidente Nicolau Lobato, Primeiru-Ministru, Taur Matan Ruak, hatete
kanselamentu ba viajen Prezidente-Repúblika nian ne’e la afeta ba relasaun
internasionál tanba ida ne’e normál akontese iha mundu.
Jornalista: Xisto Freitas | Editora:
Rita Almeida
Imajen: Majór Jenerál Lere Anan Timur
Sem comentários:
Enviar um comentário