quinta-feira, 12 de julho de 2018

Governu Prolonga Tan Mandatu Komisáriu KAK

PARTILHAR

DILI, (TATOLI) – Governu liuhosi enkontru Konsellu Ministru ohin deside prolonga tan mandatu tinan haat ba Komisáriu Komisaun Anti Korupsaun (KAK), Aderito Pinto Tilman, hosi períodu 2018 to’o 2022.

“Parlamentu Nasionál maka sei deside, governu halo de’it proposta hodi nomeia naran ba parlamentu hodi konsideraʺ, dehan Ministru Reforma Lejislativa no Asuntu Parlamentár, Fidelis Leite Magalhães, ba jornalista sira hafoin enkontru iha Palásiu Governu.

Aderito Tilman eleitu hosi PN ba komisáriu KAK iha loron 15 jullu 2014 hodi troka Aderito de Jesus Soares ne’ebé asume kargu ne’e iha 2010.

Komisáriu Aderito Tilman moris iha loron 9 fulan-dezembru 1973 iha Bobonaro no graduadu hosi fakuldade diretu Universidade Diponegoro (UNDIP) Semarang Indonézia iha 1999.

Komisáriu ne’e iha esperénsia profisionál mak hosi 2000 to’o 2005 nu’udar juiz tribunál distritál Dili, xefe prokuradór distritál Dili iha 2006 to’o 2009, xefe prokuradór distritál Baukau hosi 2011 to’o 2014.

Alende ne’e hanesan dosente fakuldade direitu iha Universidade Dili (UNDIL), Universidade da Paz (UNPAZ) hosi 2006 to’o 2009 no membru board ba avaliasaun Polísia Nasionál Timor-Leste (PNTL).

KAK ho ninia misaun maka kombate korupsaun liu dalan prevensaun, edukasaun no investigasaun. Enkuantu vizaun maka Timor-Leste Estadu Demokrátiku ida ho kultura rezensaun korupsaun ida maka forte ba interese no prospriedade povu nian.

Entretantu, iha 2009 Parlamentu Nasional aprova lei ida hodi hari KAK. Oras ne’e instituisaun ne’e kompostu hosi diresaun investigsaun, prevensaun, kampaña no peskiza inklui administrasaun finansa.

Jornalista: Agapito dos Santos | Editora: Rita Almeida

Imajen: Komisáriu Komisaun Anti Korrupsaun (KAK), Adérito António Pinto Tilman bainhira dada lia ho jornalista sira iha Palasiu Governu, ohin. Foto GPM/Samuel
PARTILHAR

Author: verified_user

Publicação luso-timorense sem fins lucrativos

0 comentários: