quarta-feira, 25 de julho de 2018

MKOT Solidariza Witness K no Bernard Collaery

PARTILHAR

DÍLI, (TATOLI) - Movimentu Kontra Okupasaun Tasi Timor (MKOT) solidariza australianu na’in rua, Witness K no Bernard Collaery, tanba hetan akuzasaun ba kamera espionajen iha Palásiu Governu, Timor-Leste, ne’ebé mak sira rua fó sai, husi Austrália.

Solidariedade ne’e, MKOT hato’o liuhusi konferénsia nomós submete petisaun ida ba embaixada Austrália, iha, Díli, ohin dader.

Portavóz MKOT, Faustino Soares informa katak MKOT hato’o solidaridade ba sidadaun australianu na’in rua ne’e tanba ho aparellu espionajen ne’ebé mak sira rua fó sai, lori Timor-Leste ba internasionál, hodi ita konsege hahú lori fila fali ita-nia konsiliasaun fronteira marítima.

“Tanba ne’e, iha situasaun agora, ita-nia kolega, belun boot na’in rua ne’e iha hela situasaun difísil nia laran, tanba ne’e nu’udar timoroan, halo solidaridade nu’udar parte fó agradesimentu ba ita-nia kolega na’in rua ne’ebé mak defende ona direitu, interese povu Timor-Leste nian, liliu kona-ba fronteira marítima,” dehan portavóz MKOT.

Nia akresenta katak MKOT hato’o kestaun ida ne’e tan konsidera Austrália kontra liberdade espresaun no demokrasia.

“Tanba ida ne’e mak ita husu governu Austrália atu respeita liberdade espresaun no justisa. Nune’e mós respeita demokrasia iha mundu, tanba ita haree akuzasaun ne’e hanesan ditadór fali, tanba ne’e husu atu Australia labele repete fali,” portavóz MKOT, Faustinho Soares hodi fó hanoin.

“Akuzaun ne’ebé Austrália halo hasoru kolega na’in rua ne’e, kontra prinsípiu direitu umanu. Tanba ne’e, ami (MKOT) kondena aktu ida ne’e,” reforsa tan Portavós MKOT, Faustino Soares.

Sekretáriu Jerál MKOT ba Asuntu Interese Nasionál, Jorge Alves, veteranu ida,  informa katak Ministériu Públiku ka tribunál Austrália, atu koondena Witness K. no Bernard Collaery, atu emprega fali ba prezu, tanba ne’e sira la konkorda.

“Agora ita (Timor-Leste no Austrália) rezolve tiha hotu, dia seis, pois sira levanta fali problema ne’e. Ne’e signifika katak governu Austrália la iha boa fé atu rezolve fronteira marítima hoi ta. Mas, tanba presaun internasionál sira (Austrália) simu, la’ós ho boa fé, simu ida ho manipulasaun de’it,” haktuir veteranu ne’e, bainhira submete petisaun ba embaixada Austrália.

Nia informa katak hafoin submete petisaun ba Embaixada Austrália, sira la hetan informasaun ruma, liliu kona-ba data fiksu ida, hodi bele hatan petisaun MKOT nian ne’e.
“Sira dehan de’it; pronto ami simu ita-boot (MKOT) sira-nia pedidu. Ami sei hato’o ba ami-nia governu,” haktuir Sekretáriu Jerál, Jorge Alves.

Entretantu, portavóz MKOT, Faustino Soares inklui mós veteran Jorge Alves informa mós katak bainhira akuzasaun ne’e kontinua halo, MKOT sei organiza tan asaun pasífika ne’ebé mak bot liutan hodi husu governu Austrália hapara akuzasaun ba Witness K no Bernard Collaery.

Jornalista: Rafy Belo | Editór: Manuel Pinto

Imajen: MKOTT iha embaixada Austrália nia oin. Foto dokumentasaun: La’o Hamutuk
PARTILHAR

Author: verified_user

Publicação luso-timorense sem fins lucrativos

0 comentários: