sexta-feira, 10 de agosto de 2018

MNEK Husu Labele Impede Xefe-Estadu Nia Partisipasaun iha Estranjeiru

PARTILHAR

DILI, (TATOLI) - Ministru Negósiu Estranjeiru no Kooperasaun (MNEK), Dionísio Babo Soares, hateten Serbisu Relasoens Internasionál Prezidénsia-Repúblika halo ona preparasaun ba Xefe-Estadu, Francisco Guterres Lú Olo nia partisipasaun iha estranjeiru espesialmente Asembleia Jerál Nasõens Unidas ba dala-73, iha Nova Yorke, ne’ebé sei realiza iha Setembru, entre loron 24 to’o 27.

Governante ne’e dehan labele impede kualker partisipasaun Prezidente-Repúblika nian iha Nova Yorke, tanba ne’e importante.

“Ita hatene di’ak-liu situasaun ne’ebé akontese iha ita-nia rain. Hanesan Ministru Negósiu Estranjeiru espera katak sei la impede kualker partisipasaun Prezidente-Repúblika nian iha Nova Yorke, tanba la’ós ba de’it reprezenta nasaun maibé reprezenta mós país ida,” afirma Dionísio ne’ebé Ajénsia Tatoli sita hosi informasaun ne’ebé publika hosi Mídia Prezidénsia Repúblika, sesta ne’e.

Babo ho ekipa hato’o relátoriu nu’udar enviadu Xefe-Estadu nian iha Simeira CPLP iha Cabo Verde foin lalais nomós informa serbisu Ministériu Negósiu Estranjeiru no Kooperasaun nian.

Relatóriu kona-ba simeira Komunidade Nasaun-sira Ko’alia Lian Portugés (CPLP-sigla portugés) ne’ebé Dionísio Babo hato’o ba Prezidente-Repúblika nu’udar relatóriu pur-eskrita no hato’o mós felisitasaun no saudasaun hosi Xefe Estadu sira CPLP ba Timor-Leste.

Iha simeira CPLP, nia haktuir, toka liu asuntu sira kona-ba mobilidade ema, kultura no tasi, ne’ebé mundu tomak fó importánsia inklui ASEAN, tanba ekonomia iha seklu XI aposta liu-ba tasi.

Governante ne’e relata mós ba Xefe-Estadu kona-ba enkontru interministériál ASEAN, diálogu ASEAN ho nia parséria sira nomós Timor-Leste nia partisipasaun iha ASEAN Regionál Forum no iha Komferénsia Bali Process ne’ebé ko’alia kona-ba tráfiku umanu no eskravatura moderna.

Enkuantu, Prezidente-Repúblika, apresia serbisu MNEK nian kona-ba ASEAN no kontenti rona Timor-Leste nian partisipasaun iha Cabo Verde ne’ebé hetan vizibilidade maka’as tebes.

Xefe-Estadu husu atu órgaun kompetente sira prepara-án, tanba iha tinan 2021, Timor-Leste maka sei asumi Sekretáriu Ezekutivu ba CPLP.

Jornalista: Xisto Freitas | Editór: Manuel Pinto

Imajen: Ministru Negósiu Estranjeiru no Kooperasaun (MNEK), Dionísio Babo Soares, kaer liman ho Prezidente-Repúblika, Francisco Guterres Lú Olo, hafoin enkontru ramata. Imajen Mídia PR
PARTILHAR

Author: verified_user

Publicação luso-timorense sem fins lucrativos

0 comentários: